Қазақстан Биоалуантүрлілік жөніндегі жаһандық қордың мүшесі болуға ниетті

Зоология институтының директоры Роман Ященко Үкімет отырысында Қазақстанда жануарлардың Қызыл кітабы жаңартылатынын айтты, деп хабарлады Elordainfo.kz Үкіметтің баспасөз қызметіне сілтеме жасап.

Ол Зоология институты бағдарламалық-нысаналы қаржыландыру шеңберінде жануарлардың Қызыл кітабына бесінші жаңартуды дайындағанын, онда алғаш рет Халықаралық табиғатты қорғау одағы (ХТҚО) қауіптерін бағалаудың халықаралық критерийлері қолданылғанын айтты. Сонымен қатар сирек кездесетін және жойылып кету қаупі төнген түрлер бойынша электрондық деректер базасы құрылғанын және ресми веб-портал әзірленгенін атап өтті. Зоология институтында зоологтар мен филологтардың құрамында Қазақ тілі бойынша терминологиялық комиссия құрылды.

«Соңғы жылдары жануарлар жүйесінде айтарлықтай өзгерістер болды. Олардың таралуы, саны және биологиялық ерекшеліктері туралы заманауи мәліметтер жинақталды. Осыған байланысты Қызыл кітаптан 21 түр алынып тасталды және жануарлардың 11 түрі енгізілді. Ал 59 түрге ғылыми және жалпы қолданылатын атаулар нақтыланды. Ғылыми зерттеулердің нәтижелері негізінде әр түрге саны мен оның динамикасы туралы мәліметтер енгізілді. Таралу мен көші-қонның егжей-тегжейлі карталары жасалып, сақтау бойынша ұсыныстар берілді. Нәтижесінде, Қызыл кітаптың қазіргі 5-ші жаңаруы жануарлардың 217 түрін, оның ішінде омыртқасыздардың 82 түрін және омыртқалылардың 135 түрін қамтиды», — деді Роман Ященко.

Жақын арада Ұлттық Қызыл тізім бойынша көпжылдық ғылыми-техникалық бағдарламаны іске қосу жоспарланып отырғаны атап өтілді. Осы жұмыстардың нәтижесінде ХТҚО бірыңғай халықаралық тәсілдерінің негізінде Қазақстанның барлық жабайы жануарлар түрлерінің өмір сүру қаупі бағаланатын болады.

Биыл биоалуантүрлілік бойынша деректерді цифрландырудың жаһандық процесі шеңберінде Зоология институты ЭТРМ-мен бірлесіп биоәртүрлілік жөніндегі жаһандық ақпараттық қорға (GBIF) қазақстандық материалдарды енгізу жұмыстарын бастады. Қараша айында осы қормен өңірлік кездесу өткізілді. Бүгінде Қазақстанның осы жаһандық құрылымның толыққанды мүшелеріне кіру процесі басталды.