Алакөл, Балқаш, Зайсан курортты аймақтарына сұраныс 5 есе артты

Жаздың алғашқы айынан Алакөл, Балқаш және Зайсан курортты аймақтарына сұраныс 5 есе артты, деп хабарлады Elorda.info Мәдениет және спорт министрлігі сайтына  сілтеме жасап.

Әсіресе Үшарал, Балқаш, Зайсан және Үржарға сұраныс өскен. Осы бағыттар арқылы туристер Қазақстанның шығысындағы курортты аймақтар мен жағажай демалыс орындарына барады.

Ірі туристік агрегатордың мәліметінше, көрсетілген бағыттар бойынша сұраныс 5 есеге жуық өсті. Өйткені Үржар және Үшарал әуежайларының ұшу-қону жолақтары бойынша  жөндеу жұмыстары аяқталды.  

Жазғы маусымда сұраныс өскен бағыттардың ішінде Ақтөбе мен Түркістан ерекше көзге түседі. Биыл туристердің екі қалаға деген қызығушылығы 40% - ға артқан.

Ішкі туризмді дамыту- шетелдік саяхатшылар санын арттыру сияқты маңызды. Мәдениет және спорт министрлігі ішкі туризмді ынталандыруға арналған түрлі бағдарламалар әзірлеп, іске асырып жатыр. Мысалы, Kids go  free бағдарламасы ел ішіндегі отбасылық демалысты тиімді жоспарлап, ақша үнемдеуге мүмкіндік береді. Туроператорлар арқылы туристік пакеттерді сатып алу арқылы отандастарымыз 30% - ға дейін үнемдей алады,-деді Мәдениет және спорт министрлігінің баспасөз хатшысы Мөлдір Әбдуалиева.

Еске салсақ, еліміздің топ-5 туристік бағытына Астана, Алматы, Шымкент, Ақтау және Атырау кіреді. Бес шаһар дәстүрлі түрде осы рейтингте көш бастап тұр. Жазғы маусымға қарай, оларға деген қызығушылық орта есеппен 20% - ға өсті.