«Жастар жалыны»: Астананың 15 ЖОО спорттық сайыстарда сынға түседі

Бүгін Nazarbaev University оқу орнында елордалық студенттер спорттың төрт түрі бойынша жүлдеге таласады, деп хабарлады Elordainfo.kz.

Жыл сайын дәстүрлі түрде өтетін студенттік фестиваль Астана қаласында белсенді түрде жалғасып жатыр. Кезекті күні 15 ЖОО студенттері шағын футбол, волейбол, үстел теннисі мен шахматтан үздіктерді анықтауға кірісті.

«Бүгін Nazarbaev University қабырғасында Астана қаласындағы 15 ЖОО-ның қатысуымен «Жастар жалыны» студенттік фестивалі аясында спорттық жарыстар өткізіп жатырмыз. Студенттерге қызықты болу мақсатында алдын ала сауалнама жүргізіп, шағын футбол, волейбол, шахмат және үстел теннисіне тоқталдық. Ауқымды шарамыз халықаралық студенттер күніне арналған. Бәсекеге шахматтан 20 жасқа дейінгі санатта әлем чемпионы Қазыбек Нөгербек пен әйелдер шахматында әлемдік турнирлерде жоғары орыннан көрініп жүрген Меруерт Камалиденованың қатысуы да студенттік фестивальдің деңгейін арттырады. Бұл тек спорттағы жүлдеге таласудан бөлек, студенттердің бір-бірімен танысып, байланыстарын нығайтатын таптырмас алаң», - деді Астана қаласы Жастар саясаты мәселелері басқармасының басшысы Самат Ибраев.

«Жастар жалыны» студенттік фестивалі (спорт және шығармашылық шаралар) 5-14 қараша аралығында жалғасып, елордадағы 50-60 мың студентті қамтитын болады.

«Бүгін мен Дене шынықтыру және бұқаралық спорт академиясы атынан сынға түсіп жатырмын. Екінші мәрте студенттік фестивальге қатысып, өз оқу орнымның намысын абыроймен қорғауға тырысамын. Шахмат жарысы ЖОО арасында өтсе де, біршама қатысушылармен Қазақстан чемпионаты аясында жолыққанмын. Оңай болмайтыны түсінікті. Жалпы алдағы уақытта Қазақстан чемпионатының финалдық ойыны мен Нидерланд Корольдігінде әлемнің үздіктері бас қосатын турнирге қатысуды жоспарлаймын. Бүгінгі бәсеке алдағы жарыстарыма жақсы дайындық болады деп үміттенемін», - дейді шахматтан 20 жасқа дейінгі санатта әлем чемпионы атанған Қазыбек Нөгербек.

Айта кетейік, барлық спорт түрлерінің жеңімпаздары бүгін анықталады.