VI жазғы Спартакиадасында астаналық балуандар қандай нәтижеге қол жеткізді

Грек рим және әйелдер күресінен VI жазғы Спартакиадасының үздіктері анықталды, деп хабарлады Elorda.info.

Еске сала кетейік, Алматы қаласындағы Балуан Шолақ атындағы спорт сарайында еліміздің VI жазғы Спартакиадасы бозкілем шеберлерінің бәсекесімен басталған болатын. Жалпы күрестен 3 қала мен 17 облыстан 650-ге тарта спортшы жиналды.

Төрт жылда бір өтетін, ел ішіндегі Олимпиада аталып кеткен жарыс әр спорт түрінен биылғы Қазақстан чемпионатының орнын басады.

Алғашқы болып грек-рим күрес шеберлері бастады. Олар өзара 7 салмақ дәрежесінде жүлдегерлерін анықтады.

Елордалық грек-рим күрес шеберлері бұл додада алтын мен күмісті еншіледі. Нақтырақ айтқанда құрама сапындағы Марлан Мұқашев (55кг) алтын медаль алып, жеңіс тұғырынан көрінді. 87 келіде өнер көрсеткен тағы бір спортшымыз Азамат Кустубаев екінші орынға табан тіреді.

Ал астаналық палуан аруларымыз келесідей нәтижелерге қол жеткізді: 59 бен 72 келіде сынға түскен жерлестеріміз Диана Каюмова мен Жамила Бақбергенова алтын қанжығалады. 50 және 76 салмақ дәрежесінде боз кілемге шыққан Светлана Анкичева мен Гүлмарал Еркебаева екінші орын иеленді иеленді. Ал 59 келіде сынға түскен Тисина Эмма үздік үштіктер қатарынан көрінді.

Әйелдер күресі бойынша жалпы есепте Алматы облысы 1-орын (144 ұпай) алса, одан кейінгі орындарға Ақмола (115) мен Түркістан облысы (113 ұпай) жайғасты.

Енді ертең және сәрсенбі күні еркін күрес шеберлері балуандар додасын аяқтайды. Бұл сында ерлер құрамасы сапында өнер көрсететін жерлестеріміз: Абзал Окенов, Ілияс Аманжолов, Нұрбек Бегжанұлы, Санжар Досжанов, Нұрлан Бекжанов, Мейрамбек Сүлейменов, Азамат Омуржанов, Уалихан Сейіт, Бейбарыс Зен, Әлібек Қыдырбай, Нұрғали Нұрғайпұлы, Рустам, Экажев Бекзат Үркімбай, Әділ Әубәкіров және ең ауыр салмақтағы Қасым Машрапхан.

Олар 9 салмақ (57, 65, 70 , 74, 79, 86, 92, 97, 125) дәрежесінде бақ сынайтын болады.

Айта кетейік, күрес түрлерінен Спартакиада 8 ақпанда аяқталады.

Балуандар сайысын Qazsport телеарнасы тікелей эфирде көрсетеді.