Іздеу «Нурикамал» фильмі қоғамдағы проблеманы көтереді – Олжас Дәлелхан (ВИДЕО)
Сабина Кәкімжан
Көрерменге жол тартқан «Нурикамал» фильмі көпшілік арасында қызу талқыланып жатыр. Фильм прокатқа шыққаннан бастап біреулер мақтаса, енді біреулер сынауда. Бір әннің тарихы желісімен түсірілген фильм қоғамдағы ерлі-зайыптылар арасындағы проблеманы көтереді. Мұндай пікірді «Нурикамал» фильмінде басты кейіпкер Тұрдықылыш Ізтаевтың рөлін сомдаған актер Олжас Дәлелхан айтты. «Ол қандай проблема?», «Көрермен бұл фильмді не үшін көруі керек?» деген сауалдардың жауабын Elordainfo.kz сайтындағы мақаламыздан оқи аласыздар.
Театр және кино актері Олжас Дәлелхан бұл фильмдегі басты рөлге түсірілімге 2 апта қалғанда бекітілген. Өнер иесі актерліктен бөлек, бірнеше фильмдерге саундтрек жазып, композиторлық қырымен де танылып жүр.
«Композитор болғандықтан, маған бұл рөл жақын болды. Кейіпкерім Тұрдықылыш Ізтаев туралы ақпарат аз. Сондықтан өз ойымнан да кейбір іс-әрекеттерін құрастырдым. Бір айта кетерлігі, түсірілімнен бір жыл бұрын «Нурикамал» әнін үнемі тыңдап, пианино мен гитарада жиі орындап жүрдім. Содан бір күні кастинг ұйымдастырушылары хабарласып, ұсыныстарын айтты. Содан көп ойланбастан, бірден рөлге келістім», - деді актер.
Оның айтуынша, кейбір көрерменнің фильмді теріс қабылдауы – ерлі-зайыптылар қарым-қатынасындағы проблеманың көрінісі.
«Атап айтсам, фильм күйеуі мен әйелі арасындағы сенімнің жоғалғанын көрсетті. Мәселен, бір-біріне сенген жұптар мұны тек кино ретінде қабылдаса, ал жарының көзіне шөп салған жандар проблема деп санап жатыр», - деді Олжас Дәлелхан.
Басты рөлді сомдаған актер фильмде бір әннің шығу тарихы баяндалатынын айтады.
«Көзге шөп салу, әйелді төмендету, ер адамды көтеру немесе жексұрын етіп көрсету секілді ой болған емес. Туындыны көрген адамдардың арасында «фильм барысында саған жыным ұстап отырды» деп айтқандар да болды. Көрермен фильмнің ұнатпаған тұсында ашуланды. Өнерсүйер қауым ойнаған рөліме сенгеніне әрі ұнағанына қуанасың, ал адами тұрғыдан басқалардың жек көргенін қаламаймыз ғой. Фильм түсірудегі басты мақсат – махаббат оқиғасын, бір әннің тарихын жеткізу. Себебі ұзақ жылдар халық арасында сақталып қалған әннің артында бір тарих жатады», - деді кейіпкеріміз.
Фильмді көруге зейнеткерлер де көптеп барып жатыр.
«Кейбір қыздар бұл фильмді көру арқылы жігіті сондай дүниелерге рұқсат алып қояды деп ойлайды. Менің ойымша, бұл фильмді әр адам өзінің сана-сезімінің деңгейіне қарай қабылдап, пікір айтып жатыр. Мәселен, егер сіздің күйеуіңіз сондай болса, демек ол бұл кино шыққанға дейін де сондай болған. Әлбетте, кинодан кейін де солай болып қала бермек. Шын мәнінде, бұл кино көзге шөп салудан құралмайды. Онда эстетика, әдемі бояулар бар. Көрермен Нурикамал мен Ханбибінің әдемілігін көреді, музыка тыңдайды. Қуантатыны, осы фильмнің арқасында кинотеатрға ата-әжелер көп барды», - деді ол.
Қазіргі кезде өнер иесі жаңажылдық қойылымға дайындалып жүр.
«Режиссер ретінде классикалық ертегілер жиынтығын көрерменге желтоқсан айында ұсынамыз. Мұнда балалардың сүйіп оқитын таңдаулы шығармалары қамтылған. Қазір соған дайындық жұмыстары қызу жүріп жатыр», - деп сөзін түйіндеді Олжас Дәлелхан.
Толығырақ видеодан көре аласыз:
