Қазақстанның цифрлық болашақты қалыптастырушы елдердің қатарына қосылуға мүмкіндігі бар - Ляззат Разбекова

Жасанды интеллект және цифрлық даму министрлігі вице-премьер деңгейінде құрылады. Мақсат – үш жылдың ішінде Қазақстанды толық цифрландырылған елге айналдыру. Президенттің бүгінгі Жолдауында айтылған  бұл мәселе туралы Астана қаласы мәслихаты депутаты Ляззат Разбекова пікір білдірді, деп хабарлады Elordainfo.kz.

«Бұл шешім цифрландырудың жай ғана құрал емес, мемлекетті дамытудың стратегиялық бағытына айналғанын көрсетеді. Оған мемлекеттік қызметтердің сапасы ғана емес, экономиканың бәсекеге қабілеттілігі, бизнестің дамуы, білім беру және тіпті өңірлік саясат та тәуелді болады.

Негізгі қадам – Цифрлық кодексті жедел қабылдау. Бұл құжат жасанды интеллектіні, үлкен деректерді, платформалық сервистерді және цифрлық инфрақұрылымды қалай тиімді пайдалану керегін анықтап, олардың экономиканың өсуіне және азаматтардың өмірін жеңілдетуге жұмыс істеуін қамтамасыз етуі тиіс.

Алайда ескеру маңызды: жаңа министрлік – мақсаттың өзі емес. Ол мемлекет, бизнес және ғылым күштерін біріктіретін құзыреттер орталығына айналуы қажет. Әйтпесе, біз нақты нәтижесіз тағы бір бюрократиялық құрылым алуымыз мүмкін.

Қазақстанның цифрлық болашақты тек қуып жетуші емес, қалыптастырушы елдердің қатарына қосылуға мүмкіндігі бар.

Жасанды интеллект және цифрлық даму министрлігін құру – дұрыс бағыттағы қадам, бірақ оның табысы Жолдауда айтылған міндеттердің қаншалықты ойластырылып жүзеге асырылуына байланысты», - деді депутат.