Іздеу 
Думан Аманжол
Астанада 10–11 қазан күндері Түркістан және Батыс Қазақстан облыстарының тауар өндірушілері қатысқан ауыл шаруашылығы жәрмеңкесі өтті. Екі өңірдің шаруалары елорда тұрғындарына 600 тоннадан астам азық-түлік өнімін ұсынды, деп хабарлайды Elordainfo.kz Астана әкімдігінің ресми сайтына сілтеме жасап.
Екі күнге созылған жәрмеңке «Қазанат» ипподромына қарама-қарсы, Қарқаралы тасжолының бойында өтті. Елорда тұрғындары мен қонақтары азық-түлік өнімдерін өндірушілерден тікелей сатып алуға мүмкіндік алды.
Жәрмеңкеде ет және ет өнімдері, сүт өнімдері, көкөністер, жемістер, балық, жұмыртқа, бал, кептірілген жемістер және басқа да азық-түлік тауарларының кең ассортименті ұсынылды.
Түркістан облысынан 60 тонна ет және ет өнімдері, 260 тонна көкөніс пен жеміс-жидек, сондай-ақ 60 тоннадан астам сүт және өзге де ауыл шаруашылығы өнімдері жеткізілді. Ал Батыс Қазақстан облысының тауар өндірушілері 50 тоннаға жуық ет өнімдерін, 80 мың дана жұмыртқа, 11 тонна балық және басқа да азық-түлік тауарларын ұсынды.
Сатып алушылар арасында күнделікті тұтынатын азық-түлік тауарларына, әсіресе көкөніс, ет және сүт өнімдеріне сұраныс жоғары болды. Жәрмеңкеге келушілер қажетті өнімдерін сатып алып қана қоймай, олардың қайдан жеткізілгені туралы ақпаратты тікелей өндірушілерден біле алды.
«Мен мұнда ұйымдастырылатын жәрмеңкелердің бірін де жібермеуге тырысамын. Бағасы жағынан да біз үшін тиімді. Қараңыздаршы, бүгін адам өте көп. Бұл халықтың осындай жәрмеңкелерге деген сұранысы жоғары екенін көрсетеді», – деп өз әсерімен бөлісті елорда тұрғыны Гүлайым Әшекова.
Өңірлік ауыл шаруашылығы жәрмеңкелерін өткізу елорда тұрғындарын азық-түлік өнімдерімен қамтамасыз етуге, отандық шаруаларды қолдауға және өңірлер арасындағы сауда байланыстарын дамытуға ықпал етеді.
Еске салсақ, Астанада төрт автобустың қозғалыс бағыты өзгерді.
