Ерлан Каналимов мәслихатта қала тұрғындарын қабылдады

Бүгін қалалық мәслихаттың қоғамдық қабылдауында Астана қаласы мәслихатының төрағасы Ерлан Каналимов кезекті қабылдауын өткізді, деп хабарлады Elordainfo.kz.

Кездесуге мәселелерді жергілікті жерде шешу үшін әкімдік басқармаларының бірқатар өкілдері шақырылды.

Ерлан Каналимовтың айтуынша, Байқоңыр ауданындағы Пәтер иелері кооперативінің төрағасымен газгольдерлерді орнату және күтіп ұстау мәселелері талқыланған.

ПИК қызметтеріне тарифтердің өсуі мәселесі тұрғын үй инспекциясы өкілдерінің қатысуымен қарастырылатын болады. Сондай-ақ «Арғымақ» ат-спорттық сауықтыру кешенінің дәрігер-реабилитологымен бірге «Нұрлы жүрек» әлеуметтік қызмет көрсету орталығы ата-аналар комитетінің төрағасына иппотерапия процедураларын өткізу мәселесі түсіндірілген.

«Келесі жылы церебралды сал ауруына шалдыққан балаларды емдеу қызметтерінің саны артады. Қаңтар-ақпан айларында мәслихаттың жұмыс кеңесі өтеді, оның басты тақырыбы аутизм және церебралды сал ауруымен ауыратын балалармен жұмыс істейтін орталықтардың қызметі болады», - деп жазды Е.Каналимов.

Сонымен қатар Сарайшық ауданы тұрғындарының өтініші бойынша №91 мектептің жанында балалар мен ересектердің ыңғайлылығы үшін автобус аялдамалары орнатылады.

Айта кетейік, бұдан бұрын қаладағы тұрғын үй алаптарындағы проблемалық мәселелер талқыланған болатын.