Астанада Нұрғиса Тілендиевтің 100 жылдығына арналған фестивальдің жабылу концерті өтті

Астанада КСРО Халық әртісі, Мемлекеттік сыйлықтың лауреаты, Халық қаһарманы Нұрғиса Тілендиевтің 100 жылдығына арналған «Құстар әні» республикалық фестивалінің жабылу концерті өтті, деп хабарлайды Elordainfo.kz.

Бүгін Астана қаласы әкімдігінің Еркеғали Рахмадиев атындағы Мемлекеттік академиялық филармониясының концерт залында КСРО Халық әртісі, Мемлекеттік сыйлықтың лауреаты, Халық қаһарманы, даңқты композитор, дирижер, күйші Нұрғиса Тілендиевтің 100 жылдығына арналған «Құстар әні» республикалық фестивалінің жабылу концерті өтті.

Концерт бағдарламасында композитордың «Атадан мұра», «Көш керуен», «Махамбет», «Абай табиғаты», «Алтын дән», «Жеңіс салтанаты» күйлері мен «Қарлығаштар», «Әке туралы жыр», «Өз елім», «Ақ шағала», «Келе жатыр құс қайтып» сынды халық жүрегінен орын алған әндері орындалды.

Кеште көрермендерге Қазақстанның еңбек сіңірген қайраткерлері Бағдат Сәмединова, Жәмила Жарқымбаева, Амантай Жұмашев, сондай-ақ халықаралық байқаулардың лауреаттары Асылзат Нұғыманова, Айбек Тұрарбеков, Фируза Рахметова және басқа да белгілі өнерпаздар өз өнерлерін ұсынды.

Халық әртістері Нұрғали Нүсіпжанов пен Майгүл Қазтұрғанова, Қазақстан композиторлар одағының төрағасы Серікжан Құттымбетұлы, өнер және мәдениет майталмандары Жалғасбек Бегендиков, Ермұрат Үсенов, Жексенбек Нұржауов, Дүйсенбай Шаштайұлы, Раушан Мусахожаева, Еділ Құсайынов, Базаралы Түсіпжанов және тағы басқалары кештің арнайы қонағы болды.

Музыкалық шығармаларды Астана қаласы әкімдігінің Еркеғали Рахмадиев атындағы Мемлекеттік академиялық филармониясының Қазақ оркестрі орындады. 

Шараға Е.Рахмадиев атындағы Мемлекеттік академиялық филармониясы Қазақ оркестрінің көркемдік жетекшісі және бас дирижері, ҚР еңбек сіңірген қайраткері, «Парасат» орденінің иегері, профессор Айтқали Жайымов, Е.Рахмадиев атындағы Мемлекеттік академиялық филармониясы Қазақ оркестрінің дирижері, ҚР мәдениет қайраткері Нұрлан Бекенов, «Шымкент концерт» концерттік ұйымының Қазақ ұлт аспаптар оркестрінің көркемдік жетекшісі, мәдениет саласының үздігі Ерлан Дәуренбеков, Үкілі Ыбырай атындағы Ақмола облыстық филармониясының Кенжебек Күмісбеков атындағы Қазақ оркестрінің бас дирижері Жанат Рашид қатысты.

Концерт - Нұрғиса Тілендиевтің бай шығармашылығын дәріптейтін және ұлттық музыкалық мәдениетке деген қызығушылықты арттыратын маңызды мәдени шара.

Іс-шарада өңірден келген өнер ұжымдары марапатталды. Марапаттау рәсімінде Халық әртісі Нұрғали Нүсіпжанов өнерпаздарға ақ батасын берді.

“Бүгін қазақ өнерінің қара домбырасы мен қобызы биікке көтерер туы болып отырғанын көріп отырмыз. Музыка ізгілікке, патриотизмге шақырады. Бүгін біз осындай тағы да бір сабақ алдық. Нұрғиса көкеміздің әруағы қолдасын! Болашақта әлі талай Нұрғисалар дүниеге келеді, қазағымыздың өнерін әлемге паш ететініне сеніміміз мол”, - деді Нұрғали Нүсіпжанов.

Сондай-ақ Астана қаласы Еркеғали Рахмадиев атындағы Мемлекеттік академиялық филармониясының бас директоры Ерлан Дәкенов сөз алды.

“Құстар әні" фестивалі мәресіне жетіп жатыр. Әлі де бастамасы деп айта аламыз. Республиканың түкпір-түкпірінде жалғасып жатыр. Филармонияның атынан келген барлық өнерсүйер қауымға алғысымызды білдіреміз”, - деді филармонияның бас директоры Ерлан Дәкенов.