Астанада домбырашы-күйшілердің ІІ қалалық байқауының жеңімпаздары анықталды

Бүгін елордада Республикалық «Күй анасы» қорының бастамасымен, сондай-ақ Астана әкімдігінің қолдауымен Дина Нұрпейісова атындағы «Астана – күй қанатында» домбырашы-күйшілердің IІ қалалық байқауы өтті, деп хабарлады Elordainfo.kz.

Жастардың ұлттық мәдениетке деген сүйіспеншілігін арттыру мақсатында өткен байқауда 40 қатысушы бақ сынады. 

Жалпы күй байқауы екі кезең бойынша өтті. Атап айтқанда, бірінші кезең онлайн форматта өтіп, нәтижесінде екінші кезеңге өткен 24 қатысушы анықталды. Олар бүгін Құрманғазының бір күйі және Дина Нұрпейісованың бір күйін орындады. 

Байқау қорытындысы бойынша, 14-18 жас аралығындағы қатысушылар арасында бірінші орынға Ералы Таупих ие болды. Екінші орын Жазира Ораковаға, ал үшінші орын Қорғасбек Изатуллаға бұйырды. 19-35 жас аралығындағы қатысушылар арасында бірінші орынды Валерия Булекбай алды. Екінші орынға Дильнара Анарбекова, ал үшінші орынға Ғалымжан Ғаббас ие болды. 

Оқи отырыңыз: «Астана-күй қанатында»: Елордада домбырашы-күйшілердің ІІ қалалық байқауы өтіп жатыр

«Бүгін күй байқауы қатысушылардың жас ерекшелігіне байланысты өтті. Яғни  қатысушылар 14-18 жас және 19-35 жас аралығында өзара бақ сынады. Бас жүлде алған қатысушыларға 250 теңге берілді. Екінші орын алғандарға 150 мың және үшінші орын алғандарға 50 мың теңге бұйырды. Сонымен қатар 5 дипломат домбырашы анықталды. Оларға Дина Нұрпейісованың шығармашылығына арналған «Ғасыр саңлағы» кітабы берілді. »,- деді Астана қаласы Қоғамдық кеңесінің мүшесі, «Күй анасы» республикалық қорының атқарушы директоры Төлеген Қуанышев.

Айта кетейік, «Күй анасы» республикалық қоры елордамызда «Күйшілер аллеясының», Дина Нұрпейсова ескерткішінің, биіктігі 5 метрден асатын «Домбыра» инсталяциясының, «Қазақтың 100 күйші мен күйші композиторлардың» заманауи цифрлық (QR) жабдықталған және алдағы уақытта «Қазақтың 100 Жыршысы  мен жырауларға» ескерткіш тастардың орнатылуына бастамашы болуда.

Сонымен қатар «Күй анасы» республикалық қорының ұйымдастыруымен 2021 жылдан бері тұрақты түрде Құрманғазы, Жамбыл, Дина Нұрпейсова ескерткіштері жанында 9 рет «Күй жәрмеңкесін» өткізіп келеді. Бірнеше әдеби-танымдық кітаптар құрастырылып шығарылды. Осы күнге дейін 238 ұлттық аспабымыз домбыраны еліміздің саз мектептерінің және әлеуметтік жағдайлары төмен отбасы балаларына «Күй анасы» қоры есебінен тегін табыс етілді.