Атырау облысында бір ай бойы әуесқой балық аулауға болмайтыны ескертілді

Тұрғындар тарапынан «Бекіре-2025» акциясы кезінде Жайық өзенінде әуесқой балық аулауға бола ма, жоқ па?» деген сұрақ туындауда. Бұл мәселеге байланысты Жайық-Каспий аймақаралық бассейндік балық шаруашылығы инспекциясының баспасөз хатшысы Рүстем Қорқытов түсініктеме берді, деп хабарлады Elordainfo.kz azh.kz-ке сілтеме жасап.

Оның айтуынша, Жайық өзенінің Атырау облысы аумағында 15 мамырға дейін әуесқой балық аулауға рұқсат етілген. Қазіргі кезде қармақ пен ілмектердің санына шектеу жоқ, бірақ бір адамға күніне 5 келіден артық балық аулауға болмайды.

Алайда 15 мамыр мен 15 маусым аралығында Атырау облысындағы барлық су айдындарында әуесқой балық аулау уақытша тоқтатылады. Бұл – балықтардың уылдырық шашу кезеңіне байланысты қабылданған шара.

Айта кетейік, бұған дейін 1 сәуірден бастап өңірде бағалы балық түрлерін, әсіресе бекіре тұқымдастарын заңсыз аулауға қарсы «Бекіре-2025» кең ауқымды балық қорғау акциясы басталды.