Іздеу Жаңа Конституцияда тұлға құқықтары мен бостандықтары ерекше орын алады – депутат
Кербез Әлішер
Конституциялық реформа жөніндегі комиссия кезекті отырысын өткізіп, жаңа Конституция жобасын жариялады. Бұл отырыс - реформалау процесінің маңызды корпоративтік баспалдағы болды. Бұл туралы Мәжіліс депутаты Ерболат Саурықов әлеуметтік желідегі парақшасында жазды, деп хабарлады Elordainfo.kz.
«Жоба алғашқы рет толық қаралып, оның құрылымы мен негізгі бағыттары комиссия мүшелері тарапынан бекітілді. Комиссия мүшелері қоғам қайраткерлері, құқық қорғаушылар, сарапшылар мен саяси ұйымдардан түскен барлық маңызды ұсыныстарды, атап айтқанда, Конституцияның барлық бөлімдеріне және 77 бабына қатысты, жалпы мәтіннің 84%-ын қамтыған түзетулерді талдап, құжатқа енгізді. Конституция жобасы мен реформалар туралы ақпарат қоғамға ашық жарияланды, бұл - реформаның қоғамдық құқықтық сипатқа ие екенін көрсетеді. Жаңа Конституция жобасында тұлға құқықтары мен бостандықтары, адамгершілік пен құқықтық қауіпсіздік қағидалары ерекше орын алады. Бұл өз алдына адамды жоғарғы құндылық ретінде мойындауды айқындайды. Сонымен бірге, адам құқықтары мен бостандықтары алғаш рет мемлекеттің негізгі басымдығы ретінде жария етілді. Бірлік пен ынтымақтастық, ұлтаралық және дінаралық келісім Қазақстан мемлекеттілігінің негізі ретінде белгіленді. Егемендік пен Тәуелсіздік, біртұтастық, аумақтық тұтастық өзгермейтін құндылықтар санатына жатқызылды. Әділеттілік, Заң мен Тәртіп, табиғатқа ұқыпты қарау сияқты қағидаттар алғаш рет Конституция деңгейінде бекітілген», - деді депутат.
Халық қалаулысының айтуынша, жаңа Преамбулада мемлекеттік биліктің бірден-бір бастауы және егемендіктің иесі Қазақстан халқы болып табылатыны бекітілген. Ата Заңымыздың жаңа мәтінінің басты идеясы ретінде білім мен ғылым, мәдениет пен инновация анықталды. Бұл – мемлекеттің болашағы минералды ресурстар мен табиғи байлықтармен емес, адами капиталмен және азаматтардың жетістіктерімен анықталатынын көрсететін түбегейлі маңызды бетбұрыс.
«Жалпы, Конституцияның жаңа редакциясының алғашқы жобасында Преамбула, 11 бөлім және 95 бап бекітілу ұсынылады. Ұсыныстар қабылдау e-Otinish және eGov порталдары арқылы жалғасып жатыр. Жаңа Конституция бойынша нақты шешімді еліміздің азаматтары жалпыұлттық референдумда қабылдайды. Конституциялық комиссияның жұмысы жалғасып жатыр», - деді Ерболат Саурықов.
Бұған дейін Қазақстан Республикасының жаңа Конституциясының жобасы жарияланғанын жаздық.
