Қазақстанда көптеген жылдар бойы әлеуметтік осал азаматтарды қолдауға бағытталған тұрғын үй көмегі жүйесі жұмыс істеп келеді. Бұл — «Тұрғын үй көмегін беру қағидаларын бекіту туралы» бұйрықпен реттелетін жергілікті бюджеттен мемлекеттік қолдау шарасы, ол ең мұқтаж азаматтардың әмиянына ауыртпалық салмай, тұрғын үйді күтіп ұстауға және коммуналдық қызмет ақысын төлеуге жұмсалатын шығындардың бір бөлігін өтейді, деп хабарлады Elordainfo.kz Табиғи монополияларды реттеу агенттігіне сілтеме жасап.
Тұрғын үй көмегі жалғыз баспанасында тұратын және тұрақты тіркелген азаматтарға, сондай-ақ мемлекеттік тұрғын үй қорынан тұрғын үйді жалға алушыларға және жергілікті атқарушы органдар берген жекеменшік сектордағы тұрғын үйді жалға алушыларға ұсынылады.
Көмек тұрақты тіркелген жері бойынша көрсетіледі. Өтінішті еGov порталы арқылы онлайн (егер бұл аймақта қарастырылған болса) немесе «Азаматтарға арналған үкімет» мемлекеттік корпорациясы» КЕАҚ-да офлайн беруге болады.
Айта кетейік, тұрғын үй көмегі тұрғын үй-коммуналдық қызметтердің тарифтерін кезең-кезеңімен көтеру кезінде халықтың осал топтарын әлеуметтік қолдаудың негізгі құралы болып қалады. Коммуналдық жүйелерді жаңартуға және жаңғыртуға қосымша қаржы салудың арқасында қазақстандықтар бүгінде жылумен және сумен қамтамасыз етуде іркілістерге тап болмайды, еліміз өткен жылыту маусымын апатсыз өткізіп, жаңасына сәтті аяқ басты, инфрақұрылым біртіндеп тұрақтанып келеді.
Жаңа тарифтік саясатты жүзеге асыру қазірдің өзінде айтарлықтай нәтижеге әкеліп, Екібастұз бен Риддерде болған жағдайға ұқсас жағдайлардың қайталануына жол бермей, елдің бүкіл экономикасын одан әрі дамытуға жол салды. Атаулы өтемақы механизмі әлеуметтік қорғау мен инфрақұрылымға инвестиция салу қажеттілігі арасындағы тепе-теңдікті қамтамасыз ете отырып, аз қамтылған отбасыларға жүктемені жеңілдетуге мүмкіндік береді.
