Төлеген Қуанышев: Қазақ халқының мәдени мұрасын дәріптейтін маңызды күн

фото: Төлеген Қуанышевтің жеке архивінен

Елімізде шілде айының бірінші жексенбісінде Ұлттық домбыра күні атап өтіледі. Биыл бұл күн бесінші шілдеге сәйкес келіп тұр. Осы мерекеге орай «Күй анасы» қоғамдық қорының басшысы, Дина Нұрпейісованың шөбересі Төлеген Қуанышев құттықтау тілегін жеткізді, деп хабарлайды Elordainfo.kz «Астана ақшамы» газетіне сілтеме жасап.

- Бұл мереке қазақ халқының мәдени мұрасын дәріптейтін маңызды күн болып табылады. Бұл қоғамды ұлттық мәдениет пен бірегейлікті сақтау мен қайта жаңғырту идеясының төңірегінде одан әрі топтастыратын күн. Мұң-қайғысын, қуанышын домбыраның үнімен жеткізе білген қазақ халқы киелі аспапты төріне ілген. «Нағыз қазақ қазақ емес, нағыз қазақ – домбыра». Күй мен жыр өнері – қазақ халқының тарихы мен мәдениеті рухани байлығының ең киелі де қасиетті түрі. Ғасырлар бойы дамып жеткен бұл өнер бүгінде ұлттық мәдени құндылықтарымыздың бірі болып саналады. Рухани байлығымызды жастарға жеткізіп, насихаттау – республикалық «Күй анасы» қорының басым бағыттарының бірі. Қор елордада «Күйшілер» аллеясының ашылуына, Дина Нұрпейісова ескерткіші мен домбыра инсталяциясының қойылуына бастамашы болды. Д.Нұрпейісованың орындауында 24 күй QR-кодқа түсіріліп, күйші жайлы жинақ жарық көрді. Осынау мерейлі мерекемен барша қазақстандықтарды құттықтаймын, ұлттық өнеріміз дами берсін, - деді «Күй анасы» қорының басшысы Төлеген Қуанышев.