Отандық өнімдердің ішкі нарыққа шығуын шектейтін қитұрқы әрекеттерді тоқтату керек - Президент

Қазақстан Президенті Қасым-Жомарт Тоқаев Қазақстан халқына кезекті Жолдауында отандық өнімдердің ішкі нарыққа шығуын шектейтін қитұрқы әрекеттерді тоқтату керектігін мәлім етті, деп хабарлайды Elordainfo.kz Ақордаға сілтеме жасап.

Сондай-ақ, Мемлекет басшысы экономикалық құқықбұзушылықтарды қоғамға қауіпті қылмыстар санатынан алып тастау жөнінде шараларды қолға алуды тапсырды. 

«Кәсіпкерлерге, әсіресе, шағын және орта бизнеске тең мүмкіндік беріп, әділ бәсекеге жол ашу қажет. Кей жағдайда осы талап сақталмайды.
 
Оған дәлел: қазірдің өзінде өндірушілер, әсіресе азық-түлік саласындағы кәсіпорындар бірқатар қиындыққа тап болуда. Тіпті, әдейі жасалған кедергілер де бар.
 
Мысалы, импорттық тауарлардың құны қолдан төмендетіліп отыр. Ал отандық өнімдердің ішкі нарыққа шығу жолы әдейі шектеліп жатады. Шынын айтқанда, бұл – жемқорлық. Сондықтан осындай қитұрқы әрекеттерді тоқтату керек.
 
Мұндай ахуал еліміздің компаниялары мен тауарларының бәсекеге қабілетін едәуір әлсіретіп жіберетіні сөзсіз.
 
Осындай іс-қимылдарға қатаң тосқауыл қоймасақ, экономикамызға зиян болатыны айдан анық. Басқаша айтсақ, бизнесті қорғау – ұлттық экономиканың дербестігін нығайту деген сөз.
 
Ал бизнеске қолдан заңсыз тосқауыл жасау, бұл – мемлекетке қарсы жасалған қылмыс деп айтсақ артық болмас.
 
Сондықтан кәсіпкерлерді қолдау тетіктерін жетілдіру, яғни нығайту қажет. Бұл жұмысты сауда бірлестіктері аясында жүргізуге де болады», - деді ол.