Нәзира Үсенова: Конституция жобасында «Әділетті Қазақстан» және «Заң мен тәртіп» қағидаттарын бекіту маңызды

Фото: видеодан алынған скрин

«Атамекен» ұлттық кәсіпкерлер палатасы басқарма төрағасының орынбасары Нәзира Үсенова түзетулерді талқылауға қоғамның белсенді қатысуы ашық және заманауи мемлекетті қалыптастырудың негізгі факторы ретінде қарастырылатынын атап өтті, деп хабарлады Elordainfo.kz.

Оның айтуынша, азаматтардың құқықтарын нығайту, адами капиталды дамыту және мемлекеттік басқарудың ашық жүйесін құруға баса назар аударылған. Іс жүзінде әділдікті қамтамасыз ететін және мемлекеттік органдардың қоғам алдындағы жауапкершілігін арттыратын институционалдық тетіктерді енгізуге баса назар аударылуда.

«Бизнестің мүдделері мен құқықтарын қорғайтын ұйым үшін, біз үшін заңнаманың сақталуына мемлекеттік бақылауды күшейтуге, мемлекеттік органдар қызметінің ашықтығын және іс жүзінде шынайы әділдікті арттыруға бағытталған «Әділетті Қазақстан» және «Заң мен тәртіп» қағидаттарының Конституция деңгейінде бекітілуі маңызды рөл атқарады», - деді Нәзира Үсенова.

Бұған дейін «Атамекен» ҰКП басқарма төрағасының орынбасары Гүлнар Бижанова цифрлық құқықтар мен киберқауіпсіздікті қорғауға ерекше мән берілген жаңа Конституция жобасының маңыздылығына тоқталған болатын.