Мемлекеттік қызметтердің сапасын арттыру, тиімді жоспарлау және озық тәжірибелерді енгізу мақсатында Маңғыстау облысының білім басқармасы мамандары Астана қаласына іс-сапармен келіп, әріптестік деңгейде тәжірибе алмасты, деп хабарлады Elordainfo.kz.

Бұл кездесудің басты мақсаты – өңірлік ерекшеліктерді ескере отырып, қызмет көрсету сапасын біріздендіру, тиімді шешімдер мен жаңа тәсілдерді білім саласына енгізу.

Тәжірибе алмасу барысында тараптар білім беру процестерін цифрландыру, мемлекеттік көрсетілетін қызметтерді автоматтандыру, құжат айналымын оңтайландыру және ата-аналармен жұмыс жүргізудің тиімді модельдерін талқылады. Маңғыстау мамандары елордада жүзеге асырылып жатқан инновациялық жүйелер мен басқару тәжірибелерімен танысып, өз өңіріне енгізуге болатын нақты ұсыныстар жинақтады.

Маңғыстау облысы әкімі аппаратының цифрландыруды дамыту және мемлекеттік көрсетілетін қызметтер мониторингі бөлімінің басшысы Роза Мұғалованың айтуынша, білім саласындағы нормативтік-құқықтық актілер әр өңірде әрқалай қолданылып жатады.

«Сондықтан халыққа сапалы қызмет көрсету үшін өзге өңірлердегі оң тәжірибелерді зерттеп, салыстырып, тиімді үлгілерді енгізу аса маңызды», - дейді ол.