Бас прокуратура «Әділет» саяси партиясына қатысты тараған ақпараттың жалған екенін мәлімдеді

Фото: Еңбек және халықты әлеуметтік қорғау министрлігі

Бас прокуратура 4 тамызда бірқатар бұқаралық ақпарат құралдарында жарияланған «Әділет» саяси партиясының қызметіне жүргізілген тексеру нәтижелері туралы ақпараттың шындыққа сәйкес келмейтінін хабарлады, деп хабарлайды Elordainfo.kz.

Ведомствоның мәліметінше, Бас прокуратура мұндай сипаттағы баспасөз хабарламасын жарияламаған және аталған партияның қызметіне қатысты тексеру жүргізбеген.

Осыған байланысты көрінеу жалған ақпарат тарату фактісі бойынша Қылмыстық кодекстің 274-бабы 2-бөлігінің 3-тармағына сәйкес сотқа дейінгі тергеп-тексеру басталды.

Бас прокуратура «Масс-медиа туралы» және «Онлайн-платформалар және онлайн-жарнама туралы» заңдарға сәйкес журналистер мен онлайн-платформаларды пайдаланушылар ақпараттың дұрыстығын тексеруге міндетті екенін еске салды. Егер ақпарат жалған немесе заңға қайшы болса, оны таратуға жол берілмеуі тиіс.

Ведомство азаматтар мен бұқаралық ақпарат құралдарын заң талаптарын сақтауға, жалған мәлімет таратпауға және тек Бас прокуратураның ресми интернет-ресурсында жарияланған ақпаратқа ғана сенуге шақырды.

Еске салсақ, Президент жанындағы Орталық коммуникациялар қызметінің Жалған ақпаратқа қарсы іс-қимыл орталығы елдегі саяси үдерістерге қатысты дипфейктердің қайта тарай бастағанын ескертті.

#«Әділет» саяси партиясы