«Байсерке аспаны – 2026» авиациялық шоуын 10 мыңға жуық адам тамашалады

Фото: Туризм және спорт министрлігі

Алматы облысындағы Байсерке аэродромында «Байсерке аспаны – 2026» ауқымды авиациялық шоуы ұйымдастырылып, іс-шараға 10 мыңға жуық көрермен қатысты, деп хабарлайды Elordainfo.kz Туризм жəне спорт министрлігіне сілтеме жасап.

Іс-шара барысында қонақтарға түрлі әуе техникасының мүмкіндігі мен кәсіби ұшқыштардың шеберлігі көрсетілді. Авиациялық бағдарламаға Ми-2 және Ми-8АМТ тікұшақтары, Ан-2, Як-18Т, Як-52, Як-55, Socata TB-10, Socata TB-20, Partenavia P.68 ұшақтары, сондай-ақ мотодельтапландар мен авиамодельдер қатысты.

Көрермендер үшін тәжірибелі ұшқыштардың жоғары пилотажы, Ми-8АМТ тікұшағы арқылы өрт сөндіру техникасының көрсетілімі және екі Ан-2 ұшағынан парашютшілердің жаппай десанты ұйымдастырылды. Бұдан бөлек, «Ромб» және «Веер» форматындағы топтық ұшулар көпшілік назарына ұсынылды.

Авиациялық шоудың қорытынды бөлімінде ұшқыштар мен парашютшілердің бірлескен көрсетілімі өтті. Бағдарлама «Небо Байсерке» гимні, барабан шоуы және салютпен аяқталды.