Әуелі экранда, кейін алаңда: Фиджитал дисциплинасы әлемдік спорттың жаңа форматына айналды

«Болашақ ойындары» туралы сөз болғанда көпшілік ең алдымен Dota 2, PUBG немесе Mobile Legends ойындарын еске алады. Алайда турнирдің басты ерекшелігі тек киберспортпен шектелмейді. Дәл осы жарыста жеңіске жету жолындағы күрестің ажырамас бөлігіне цифрлық кезең де, нақты спорт алаңындағы ойын да айналған ерекше форматтағы жарыстарды көруге болады, деп хабарлайды Elordainfo.kz.

Бұл формат фиджитал деп аталады. Атауы physical (физикалық) және digital (цифрлық) сөздерінің бірігуінен шыққан. Оның негізгі қағидаты қарапайым: спортшылар алдымен спорт түрінің виртуалды нұсқасында сынға түседі, содан кейін тартысты нақты спорт алаңында жалғастырады. Қорытынды нәтиже екі кезеңнің жиынтық көрсеткіші бойынша анықталады. Сондықтан жеңіске тек ойын контроллерін де, спорт алаңын да бірдей деңгейде меңгерген қатысушы ғана жете алады.

Дәл осы идея 2026 жылғы 29 шілде мен 9 тамыз аралығында Астанада өтетін «Болашақ ойындары 2026» (GOTF 2026) Powered by Samruk-Kazyna халықаралық турнирінің негізіне айналған. Жарысқа 50-ден астам ұлттың 800-ден астам спортшысы қатысады.

Турнирдің ең әсерлі дисциплинасының бірі – Phygital Football. Алдымен командалар футбол симуляторында бақ сынасады, кейін шағын футбол алаңына шығып, кездесуді шынайы форматта жалғастырады. Жеңімпаз екі кезеңнің жиынтық нәтижесі бойынша анықталады.

Биыл Астанаға түрлі құрлық пен футбол мектептерінің өкілдері келеді. Қатысушылар қатарында Оңтүстік Американың ең атақты клубтарының бірі саналатын уругвайлық Peñarol, Kings League жанкүйерлеріне жақсы таныс испаниялық LOS TRONCOS FC, сондай-ақ Африкадағы ең танымал спорт брендтерінің бірі саналатын ORLANDO PIRATES FIVES бар.

Олармен бірге FFK Rotor, Club Holcattes, FC OLYMPIC PHYGITAL, Oeste SP, UEL Team және халықаралық іріктеуден өткен өзге де командалар өнер көрсетеді.

Осындай құрамның арқасында фиджитал футбол турнирі шын мәнінде халықаралық деңгейдегі жарысқа айналады. Бір алаңда Еуропа, Латын Америкасы, Африка және Азия өкілдері кездеседі.

Дәл осындай қағидат Phygital Basketball дисциплинасында да қолданылады.Алдымен қатысушылар цифрлық матч өткізеді, кейін нақты баскетбол алаңына шығып, 2×2 форматында ойынды жалғастырады.

Бұл жарыста тек виртуалды немесе тек физикалық кезеңде мықты болу жеткіліксіз. Жеңіске жету үшін екі кезеңде де жоғары нәтиже көрсету қажет. Чемпиондық үшін Испанияның әйгілі Valencia Basket, Аргентинаның атақты Boca Juniors, қазақстандық PBC Astana, сондай-ақ Dangerous, Team Apex, Paris Phygital, MINSK, Club Pepesqueros және әлемнің өзге елдерінен келген командалар бақ сынайды.

Қазақстандық жанкүйерлер үшін PBC Astana командасының қатысуы жарыстың тартымдылығын арттыра түседі. Жергілікті команда халықаралық деңгейдегі мықты қарсыластармен күш сынасып, өз мүмкіндігін дәлелдеуге мүмкіндік алады.

Фиджитал дисциплиналары ерекше форматының арқасында әлем бойынша қарқынды танымалдыққа ие болып келеді. Олар дәстүрлі спорт пен киберспорт жанкүйерлерін бір алаңға тоғыстырып, мүлде жаңа аудитория қалыптастыруда. Бұл жерде жылдам реакция, тактикалық ойлау, жоғары дене дайындығы, командалық өзара әрекет және екі түрлі ойын форматы арасында жылдам бейімделу қабілеті бірдей маңызды.

Сондықтан көптеген қатысушы фиджиталды дәстүрлі спортқа балама емес, оның жаңа даму кезеңі деп бағалайды. Мұнда цифрлық технологиялар спорт шеберлігін алмастырмайды, керісінше оны жаңа деңгейге көтеретін маңызды құрамдас бөлікке айналады.«Болашақ ойындары 2026» (GOTF 2026) Powered by Samruk-Kazyna аясында әлемнің ең үздік командалары сегіз дисциплина бойынша бақ сынайды. Олардың қатарында Dota 2, PUBG, сондай-ақ фиджитал футбол мен фиджитал баскетбол бар.

Қазақстан үшін бұл тек ауқымды халықаралық турнирді қабылдау ғана емес. Бұл – еліміздің әлемде қарқынды дамып келе жатқан жаңа спорттық қозғалыстың маңызды орталықтарының біріне айналып келе жатқанын көрсететін мүмкіндік.