Астаналық балуан Қазақстан кубогының чемпионы атанды

Фото: Астана қаласы әкімдігі

Алматы қаласында ересектер арасында грек-рим, еркін және әйелдер күресінен Қазақстан кубогы өтіп жатыр. Елордалық балуан Бағдат Сабаз жарыстың алғашқы күні-ақ чемпион атанды, деп хабарлайды Elordainfo.kz қала әкімдігінің ресми сайтына сілтеме жасап.

Дәстүрлі додаға еліміздің түкпір-түкпірінен 800-ден астам балуан қатысып, жүлделерді сарапқа салуда. Олардың қатарында әлем және Азия чемпионаттарының, Олимпиада ойындарының жүлдегерлері де бар.

Жарыстың алғашқы күнінде грек-рим күресінен жүлделер сарапқа салынды. Нәтижесінде елордалық балуандар 1 алтын және 1 қола медаль жеңіп алды.

67 келі салмақ дәрежесінің финалында елордалық балуан Бағдат Сабаз Жамбыл облысының спортшысы Ержет Жарлықасынмен белдесті. Финалдық кездесуде Бағдат Сабаз белсенді күрес көрсетіп, алғашқы минуттардан-ақ басымдыққа ие болды. Қорытындысында ол 6:0 есебімен жеңіске жетіп, Қазақстан кубогының чемпионы атанды.

Айта кетейік, Бағдат Сабаз 2025 жылы Вунгтау қаласында өткен U23 Азия чемпионатының жеңімпазы болған.

Сонымен қатар грек-рим күресінен 55 келі салмақта елордалық Марлан Мұқашев қола медаль иеленді.

Алдағы күндері бозкілемге әйелдер мен еркін күрес шеберлері шығады. Қазақстан кубогы 17 мамырға дейін «Алматы Арена» спорт кешенінде өтеді.

Еске сала кетейік, Астанада скандинавиялық жүрістен зейнеткерлер арасында спорттық іс-шара өтті.