Астанада Сарыарқа ауданында жоғалып кеткен 5 жасар бала полицейлердің жедел әрекетінің арқасында аман-есен табылды, деп хабарлайды Elordainfo.kz.

Оқиға баланың әкесімен аулада серуендеп жүрген кезінде болған. Әкесі назарын бір сәтке басқа жаққа аударған сәтте бала көзден таса болып, ол өз бетімен іздеп таба алмаған соң бірден полицияға хабарласқан.

Іздестіру жұмыстары қалай жүргізілді?

Хабар түскен бойда Сарыарқа аудандық полиция басқармасының қызметкерлері аумақты шұғыл тексере бастады.

Іздеуге ювеналдық полиция инспекторлары, учаскелік қызметкерлер, патрульдік жасақтар және жедел уәкілдер жұмылдырылды.

Құқық қорғаушылар айналадағы бақылау камераларының жазбаларын қарап, баланың бағыт алған жолын анықтады. Камерадан оның әуелі аулада жүргені, кейін көпқабатты үйдің бір подъезіне кіргені көрінген.

Бала аман-есен әкесіне тапсырылды

Полицейлер сол үйді дереу тексеріп, баланы тапты. Баланың денсаулығына ешқандай қауіп төнбеген. Ол бірден әкесіне қайтарылды.

Құқық қорғау органдары ата-аналарды балаларды қараусыз қалдырмауға, қауіпсіздікке қатысты сақтық шараларын ұстануға шақырды.