Астана қаласы Білім басқармасының қолдауымен Әдістемелік орталық және Әлімхан Ермеков атындағы №38 мектеп-лицейінің ұйымдастыруымен педагогтерге арналған халықаралық деңгейдегі «Білім берудегі серпіліс: цифрлық технологиялар, құндылықтар және зерттеу тәжірибелері» атты конференция ұйымдастырды, деп хабарлады Elordainfo.kz.

Іс-шараға жоғары оқу орындары, техникалық және кәсіптік білім беру ұйымдары мен жалпы орта білім беру мекемелерінің мамандары қатысты.

Конференцияның негізгі мақсаты – оқу үдерісінде цифрлық технологияларды тиімді қолдану, оқушылардың құзыреттіліктерін қалыптастырудың заманауи тәсілдерін талқылау, сабақ әзірлеуде қолданылатын Scaffold құралының мүмкіндіктерін таныстыру, сондай-ақ Lesson Study, Action Research, Formative Assessment Research және Learning Study секілді сабақты зерттеу әдістерінің тәжірибесін тарату.

Іс-шараға АҚШ, Италия, Моңғолия, Өзбекстан, Қырғызстан елдерінен PhD докторлар, зерттеуші ғалымдар, педагогтер, сондай-ақ отандық жоғары оқу орындарының профессор-оқытушылары, колледж және мектеп педагогтері, студенттер қатысты. Бұл конференция халықаралық ынтымақтастықты нығайтып, білім беру саласының өзекті мәселелерін талқылауға кең мүмкіндік берді.

Конференция барысында педагогтер цифрлық технологияларды тиімді пайдалану, инклюзивті және құндылыққа негізделген білім беру мүмкіндіктері, оқыту тәжірибесін жетілдіруге бағытталған инновациялық әдістер бойынша өз тәжірибелерімен бөлісті.

Конференцияның екінші күні шетелдік қонақтар үшін арнайы білім беру туры ұйымдастырылды. Олар №111 жалпы білім беретін мектеп пен Абай Құнанбайұлы атындағы №87 мектеп-гимназиясының жұмысымен танысып, ұстаздардың озық әдістемелік тәжірибелерін, оқушылардың робототехника саласындағы заманауи жобаларын тамашалады. Сонымен қатар №5 «Ақбота» балабақшасында өткен «Өмір қауіпсіздігі» атты кешенді қойылымды көрді.

Шетелдік делегаттар Астана қаласының білім беру ұйымдарына, Әдістемелік орталық пен №38 мектеп-лицей ұжымына жылы лебіздерін білдіріп, ұйымдастыру деңгейін жоғары бағалады.