Іздеу Астанада алғаш рет UNICEF Charity Run қайырымдылық жүгіру марафоны өтеді
Жәнібек Амангелді
20 қыркүйекте елордадағы Ботаникалық бақта БҰҰ Балалар қоры (ЮНИСЕФ) ұйымдастыратын UNICEF Charity Run 2026 қайырымдылық жүгіру марафоны өтеді, деп хабарлайды Elordainfo.kz Туризм жəне спорт министрлігіне сілтеме жасап.
Іс-шара балаларды қолдауға және Қазақстанда инклюзивті қоғам қалыптастыруға бағытталған. Жиналған қаражат ЮНИСЕФ-тің осы бағыттағы бағдарламаларын қолдауға жұмсалады.
UNICEF Charity Run – әлемнің ірі қалаларында өткізіліп келе жатқан қайырымдылық жүгіру дәстүрінің жалғасы. Астана биыл бұл халықаралық бастамаға алғаш рет қосылып отыр.
Қатысушылар үшін 2, 5 және 10 шақырымдық үш қашықтық қарастырылған. 2 шақырымдық жүгіруге 7-15 жас аралығындағы балалар тегін қатысады. 5 және 10 шақырымдық қашықтыққа 16 жастан асқан азаматтар қатысады. Балалар мен мүгедектігі бар адамдарды тіркеу ЮНИСЕФ-тің Қазақстандағы платформалары арқылы жүргізіледі.
Бағдарлама 20 қыркүйекте сағат 08:00-де басталады. 10 шақырымдық қашықтыққа жүгіру сағат 09:00-де, 5 шақырымдық жарыс 09:10-да, ал балалар арасындағы 2 шақырымдық жүгіру 09:15-те басталады. Балалар үшін сағат 08:30-дан 12:00-ге дейін арнайы ойын-сауық бағдарламасы ұйымдастырылады.
Жүгіру жиынтықтары 18-19 қыркүйекте 09:00-ден 20:00-ге дейін Qazaqstan жеңіл атлетика спорт кешенінде беріледі. Басқа қалалардан келгендер жиынтығын 20 қыркүйек күні сағат 07:00-ден 08:00-ге дейін ала алады.
Іс-шараны Туризм және спорт министрлігі, Астана қаласының әкімдігі, Спортты қолдау қоры және ЮНИСЕФ бірлесіп ұйымдастырады. 5 және 10 шақырымдық қашықтықтарға тіркелу Freedom Ticketon платформасы арқылы жүргізіледі.
Еске сала кетсек, ертең Астанада «Jana men kùz run» бұқаралық күзгі жүгіру жарысы өтеді.
