Аида Балаева Шымкенттің туристік және мәдени әлеуетін бағалады

Фото: Үкіметтің баспасөз қызметі

Премьер-министрдің орынбасары – мәдениет және ақпарат министрі Аида Балаева Шымкент қаласына жұмыс сапары барысында шаһардың туристік әлеуетін саралап, қоғамдық кеңістіктердің даму барысымен танысты, деп хабарлайды Elordainfo.kz Үкіметтің баспасөз қызметіне сілтеме жасап.

Вице-премьер сапар барысында Шымкент цитаделіне барып, музей экспозицияларын аралап, тарихи-мәдени мұраны сақтаудың маңызын атап өтті. Сондай-ақ, этноауылда болып, мұндай нысандарды архаикаға бой алдырмай, заманауи, креативті әрі инновациялық форматта дамыту қажеттігін айтты.

Қалалық мәдениет, гастрономия және креативті индустрия салаларындағы бірқатар жобалар таныстырылған Арбат жаяу жүргіншілер аллеясының әлеуетімен танысу барысында Аида Балаева осы аумақта бос жұмыс орындары жөніндегі өзекті ақпарат пен жастарға арналған маусымдық кәсіптік бағдар беру материалдары ұсынылатын жұмыспен қамту орталығын орналастыру мүмкіндігін қарастыруды ұсынды.

Сонымен қатар, креативті ортаны дамытуға, жас таланттарды қолдауға және мәдени мұра мен инновациялық тәсілдер үндескен заманауи қалалық инфрақұрылымды қалыптастыруға ерекше назар аударылды.

Еске салсақ, Премьер-министр Олжас Бектенов мемлекеттік аппарат пен басшыларға қойылатын талаптарды айтқан еді.