Шымкент қаласында мүгедектігі бар адамдар үшін 967 объект бейімделген

Мүгедектігі бар адамдардың заңды құқықтарын қамтамасыз ету және олар үшін қолжетімді ортаны қалыптастыру мақсатында Шымкент қаласында 967 әлеуметтік инфрақұрылым нысаны толық бейімделді, деп хабарлады Elordainfo.kz Еңбек және халықты әлеуметтік қорғау министрлігіне сілтеме жасап.

Қазіргі уақытта Қазақстан Республикасында 2025-2030 жылдарға арналған инклюзивті саясат тұжырымдамасы, «Аманат» партиясының 2023-2027 жылдарға арналған жол картасы және Мемлекет басшысының тапсырмасы бойынша әзірленген «Халықпен бірге» жобасы іске асырылуда.

«Amanat» партиясының жол картасында 2023-2027 жылдар аралығында интерактивті қолжетімділік картасына (бұдан әрі – Карта) енгізілген 42 мыңнан астам нысанды бейімдеу бойынша жұмыс көзделген. Жыл сайын осындай объектілердің 20%-ы бейімделуі тиіс. Осылайша, 2023 жылы – Картадағы объектілердің 20%, 2024 жылы – 40%, 2025 жылы – 60%, 2026 жылы – 80%, 2027 жылы – 100%-ы бейімделеді. Қазіргі уақытта ел бойынша 22 980 нысан толықтай бейімделген.

2024 жылдың соңына дейін Шымкент қаласы бойынша 491 нысанды бейімдеу жоспарланған, қалада 967 нысан бейімделіп, жоспар артығымен орындалды.

Мәселен, өңірдегі 967 нысан мүгедектігі бар адамдардың барлық санаттары үшін қолжетімді. Олардың ішінде:

- денсаулық сақтау объектілері – 138;

- білім беру мекемелері – 429;

- мәдениет нысандары – 33;

- сауда және қызмет көрсету объектілері – 195;

- мемлекеттік және квазимемлекеттік ұйымдар – 55;

- спорт нысандары – 9;

- әлеуметтік қорғау объектілері – 9;

- өзге де объектілер – 99.

«Қаланың көптеген жерлерінде мүгедектігі бар адамдардың еркін жүріп-тұруына жағдай жасалған. Соның ішінде адамдар жиі баратын денсаулық сақтау мекемелері және зейнетақы мен жәрдемақы алу үшін банк бөлімшелерін атауға болады. Байтұрсынов көшесінде орналасқан «Жүрек орталығы» ғимаратында жүріп-тұруы шектеулі адамдарға ыңғайлы болу үшін пандустар, тактильді жолақтар мен мнемосхемалар, сондай-ақ еркін жүруге қолайлы жағдай жасайтын тегіс жолдармен жабдықталған», – деп бөлісті бірінші топтағы мүгедектігі бар Шымкент қаласының тұрғыны Төленді Атахаев.