Жәнібек Әлімханұлы кәсіпқой боксшылардан көңілі қалғанын айтты

Орта салмақта WBO/IBF нұсқасы бойынша әлем чемпионы Жәнібек Әлімханұлы кәсіби бокстың қазіргі жағдайынан және басқа чемпиондардың жекпе-жектен бас тартуынан көңілі қалғанын білдірді, деп хабарлады Elordainfo.kz.

«Мен әрдайым чемпиондармен жекпе-жекке шығуға дайын болдым және қазір де дайынмын. Чемпиондар, қайдасыңдар? Кейбір чемпиондар — қорқақ! Біз мұны жақсы білеміз! Мен екінші орта салмаққа көтеріліп, дәл қазір чемпионмен шайқасуға дайынмын. Бірақ олар менімен жекпе-жекке шықпайды. Менімен жұдырықтасуға дайын чемпиондар бар ма? Өкінішке қарай, бокс қазір бизнеске айналды. Боксшылар белбеуден гөрі ақшаны көбірек қалайды. Бокста осындай жағдай болып жатқаны өте өкінішті», - деп жазды Ж.Әлімханұлы өз парақшасында.

Естеріңізде болса, Жәнібек Әлімханұлы соңғы рет шаршы алаңға былтыр қазан айында Сиднейде (Аустралия) шығып, тоғызыншы раундта Жаңа Зеландия өкілі Андрей Михайловичті (21-1, 13 КО) техникалық нокаутпен жеңген болатын.