Шағын футболдан БАҚ лиганың он бірінші маусымы мәресіне жетті

BAQ liga бәсекесінің құдіреті сол, соңғы турға дейін кімнің чемпион, кімнің жүлдегер болатынын білмейсің. Соңғы турда басты бәсекелестер өзара кездесіп, жеңімпазды анықтап жатады. Бұл жолы да солай болды.

БАҚ лиганы бұған дейін жеті рет жеңген "Хабар" мен былтырғы чемпион "Қазмедиа" кездесті. Бірі турнир кестесінде екінші орында, бірі көш бастап тұрған ұжым. "Хабарға" бас жүлдеге қол жеткізу үшін тек жеңіс қажет болатын. "Қазмедиаға" тең есеп те жеткілікті еді. Алайда, жауынды алаңда "хабарлықтардың" қарқыны мықты болды. Ә дегеннен-ақ алға атой салған олар Шыңғыс Ерғалиев пен Қолғанат Салин соққан жылдам голдардың арқасында бірінші таймды 2:0 есебімен аяқтады. Екінші таймның басында Бақытжан Масақов таблодағы көрсеткішті 3:0-ге жеткізді. Одан кейін Ділшад Сырлыбаев есепті қысқартқандай болып еді, алайда соңғы минутта Елдос Өмірхан ашық қалған қақпаға "Хабардың" төртінші голын тоғыта салды. Қорытынды есеп – 4:1, "Хабар" командасы чемпион атанып қана қоймай, ауыспалы кубокты біржола өздеріне қалдырды.

Сонымен қатар, 3-орын иегері де соңғы турда анықталып, "Metaratings.kz" командасы қола жүлдеге қол жеткізді.

Бұдан бөлек, команда капитандарының дауыс берулері нәтижесінде маусымның үздіктері де марапатталды. Ал Қазақстан футбол федерациясы бекіткен Fair play арнайы кубогы маусымның ең тәртіпті командасы "Хабар 24"-ке бұйырды.

BAQ LIGA чемпионат

1-орын: Хабар агенттігі

2-орын: Қазмедиа орталығы

3-орын: Metaratings.kz сайты

BAQ LIGA кубогы

1-орын: Хабар агенттігі

2-орын: Еуразия бірінші арнасы

3-орын: Қазмедиа орталығы

Fair play кубогы - Хабар 24 телеарнасы

Үздік ойыншы - Құмарбек АЗАТ (Қазмедиа)

Үздік шабуылшы - Айбек ЖАБЫҚБАЕВ (Еуразия бірінші арнасы)

Үздік қорғаушы - Нұрсұлтан ҚҰРМАН (Хабар)