Классикалық музыканың терапевтік әсері бар – маман

Классикалық музыканың адамдарға ерекше әсер етіп, олардың өмірін байыта алады. Әрбір концертте ұлы композиторлардың шығармалары орындалғанда, музыка орындаушы мен көрерменнің арасындағы көпірге айналатыны сезіледі. Қазақстанның Еңбек сіңірген қайраткері, «Астана Опера» симфониялық оркестрінің виолончель тобының концертмейстері Дәулет Шәкіров классикалық музыка туралы осындай пікірде, деп хабарлады Elordainfo.kz.

«Ең алдымен, классикалық музыка – бұл тек дыбыс емес, тұтас эмоциялар мен ойлардың әлемі. Ол шаттықтан мұңға дейінгі терең сезімдерді оята алады. Орындаушылар ретінде біз көрермендердің біздің өнерімізге қалай жауап қататынын жиі сезінеміз – бұл шабыт, оны бағаламау мүмкін емес. Менің байқағаным, музыка адамдарға тіпті қысқа уақытқа болса да, күнделікті өмірдің күйбең тірлігін ұмытып, өнер әлеміне сүңгуге көмектеседі.

Сонымен қатар, оркестрде ойнау командалық рухты дамытатынын байқадым. Әр музыкант жалпы үндестікке өзінің ерекше үлесін қосады. Бұл сахнада ғана емес, өмірде де маңызды бірлік сезімін тудырады. Біз бір-бірімізді тыңдап, түсініп, қолдауды үйренеміз, бұл бізді тек жақсарта түседі», - деді Дәулет Шәкіров.

Кәсіби маманның айтуынша, классикалық музыка ақыл-ой денсаулығына да оң әсер етеді. Музыкамен айналысқан сайын адамның назары мен есте сақтау қабілеті жақсарады. Ғылыми зерттеулер бұл білімді растайды: музыка когнитивті дағдыларды дамытуға ықпал етеді және тіпті оқуға көмектеседі. Біз күрделі шығармаларды үйренген кезде, бұл бізден толық назар аударуды және іске адалдықты талап етеді.

«Әлбетте, классикалық музыканың терапевтік әсері бар екенін айтқым келеді. Күнделікті жұмыстан кейін Шопен немесе Дебюсси шығармаларын жиі тыңдаймын, бұл маған демалуға және күш жинауға көмектеседі. Көптеген адамдар классикалық музыканы тыңдап, дәл осындай сезімдерді бастан кешіретініне сенімдімін», - дейді ол.

Сонымен, классикалық музыка – бұл тек өнер ғана емес, сонымен қатар тұлғалық өсуге, эмоциялық баюға және денсаулықты нығайтуға арналған қуатты құрал екенін біле жүрелік.