Іздеу «Мектепте мини юбка киген қыздар жүкті болып жатыр»: Атышулы блогер мәлімдеме жасады
Ернұр Қайнар
Блогер Жанәділ Райымбеков мектепте оқитын қыздардың қысқа белдемше киюі олардың ерте жүкті болуына әсер етіп жатқанын айтып, дабыл қақты, деп хабарлады Elordainfo.kz.
«Мектепке тізеден келетін немесе тізеден жоғары шотланд белдемшесін киіп баратын қыздар өте көп. Кеше статистиканы көрдік. Түркістан облысында 400-ден астам мектеп жасындағы қыздар жүкті болып қалған. Енді сіз ойлап қараңыз, сол мектепте жүріп қыздардың электронды темекі шегетінін, есірткі тұтынатынын, түнгі клубқа баратынын бәрі біледі. Мини юбка киіп, кеудесі тырысқан көйлек киіп жүреді. «Бұл біздің дәстүрімізде жоқ, қай қазақтың қызы осындай киіп еді» деп айқай шығарып, Парламентте мәселе көтеріп отырған ешкімді көрмедім. Бірақ, бір қыз орамал тағып, «5-пен» оқып, қызыл дипломмен бітірейін деп жатса да жер-жебіріне жетеді. Мәселе көтеріп, оны Парламентте талқылап, министрліктен тыйым салу туралы бұйрық шығарып, біздің салтымызда жоқ деп талайды», – дейді блогер.
Жанәділ Райымбеков қазақ әйелдерінің ешқайсысы жалаңбас жүрмегенін еске салды.
«Қай қазақтың әйелі жалаңбас жүрген еді. Бәрі жаулықпен жүрген, тіпті жастарының өзі де орамал таққан. Сол қыздардың бәрін мектепке кіргізбейді. 15 см тырнақ өсіріп мектепте оқып жүргендер де бар. Бірақ, орамалға рұқсат жоқ. ЛГБТ өкілдеріне көшеде еркін жиналыс жасап, көшеде шеру жасауға рұқсат етеді. Бірақ, орамал тағуға рұқсат жоқ. Соның бәрін көріп тұрып, қоғамдық мәселе көтеріп жатқан бір адам көрген жоқпын», - дейді ол Instagram желісіндегі парақшасында.
Желі қолданушылары түрлі пікір білдіріп, зорлық-зомбылыққа қарсы екендерін жазды.
«5 жастағы қызды зорлап кеткендер қаншама?!», «Өте дұрыс айтасыз», «Қазақ әйелі хиджап кимеген», «Жүктіліктің себебін таптым деп ойлап тұр-ау», «Жігіттер арампиғылды болмауы керек», - деп жазды көпшілік.
