Іздеу Қостанай облысында алимент төлемейтін 157 адам жауапқа тартылды
Жәнібек Амангелді
Қостанай облысында алимент төлемейтін 157 адам жауапқа тартылды және 240 миллион теңгеден астам өндірілді, деп хабарлайды Elordainfo.kz Бас прокуратураға сілтеме жасап.
Қостанай облысы прокуратурасының бастамасымен облыстың барлық өңірінде алимент бойынша борышкерлерді жұмыспен қамту үшін «Enbek қолдау» бос орын жәрмеңкесі өткізілді.
Жыл басынан бері жәрмеңкелер арқылы 100-ден астам борышкер жұмысқа орналастырылды, бұл балаларды асырап-бағуға алимент төлемінің тұрақты түсуін қамтамасыз етуге мүмкіндік берді.
Алимент төлемеу үшін кірісін жасыратын немесе ресми жұмыспен қамтудан жалтаратындарға ерекше назар аударылады. Осылайша, Рудный қаласының тұрғыны кәмелетке толмаған қызын асырау үшін алимент төлеуден ұзақ уақыт жалтарған. Сот актісін орындамағаны үшін әкімшілік жауаптылыққа тартылғанына және қылмыстық жауаптылық туралы бірнеше рет ескертуге қарамастан, 3,5 млн теңге берешегі болған кезде ол жұмыспен қамту және қарызды өтеу бойынша шара қабылдамаған.
Борышкерге қатысты Қылмыстық кодекстің 139-бабы бойынша сотқа дейінгі тергеп-тексеру басталды. 27 сәуірде сот үкімімен ол кінәлі деп танылып, бір жылға бас бостандығы шектелді.
Сонымен қатар, сот жазаны өтеу кезеңінде пробациялық бақылау белгіледі, сонымен қатар ойын-сауық мекемелеріне және ішімдік сататын дүкендерге баруға тыйым салды.
«Жыл басынан бері прокурорлық қадағалау актілері бойынша барлығы 200-ден астам кәмелетке толмағанның құқығы қорғалған. Алимент өндіру туралы сот актісін орындамағаны үшін 132 борышкер әкімшілік жауаптылыққа, 25-і – қылмыстық жауаптылыққа тартылды. 240 миллион теңгеден астам сомаға алимент бойынша берешек өндіріп алынды», делінген хабарламада.
Еске салсақ, БҚО-да алимент төлемеген борышкер бас бостандығынан айырылды.
