Қазақстанда «Мейірімділік апталығы» басталды

Фото: Мәдениет және ақпарат министрлігі

Қазақстанда «Игі істер марафоны» республикалық жобасы аясында 21-28 қыркүйек аралығында өтетін «Мейірімділік апталығы» басталды. Бастама волонтерлік пен қайырымдылықты қоғамда кеңінен насихаттауды көздейді, деп хабарлайды Elordainfo.kz Мәдениет және ақпарат министрлігіне сілтеме жасап.

Сегіз күн бойы еліміздің барлық өңірінде мемлекеттік органдардың, білім беру және медицина ұйымдарының, үкіметтік емес ұйымдар мен волонтерлердің қатысуымен түрлі акциялар мен іс-шаралар өтеді. Әсіресе әлеуметтік қолдауды қажет ететін азаматтарға көмек көрсетуге, жануарларға қамқорлық танытуға және қоршаған ортаны қорғауға басымдық беріледі.

«Жоба қазақстандықтарды игі іске жұмылдырып, қайырымдылықты күнделікті өмірдің игі дәстүріне айналдыруды, қоғамдағы ауызбіршілік пен бір-біріне қол ұшын беру ниетін арттыруды мақсат етеді. Апталық аясындағы іс-шараларға еліміздің түкпір-түкпірінен мыңдаған адам қатыспақ», - делінген хабарламада.

«Кішкентай қадам – үлкен өзгеріс!» ұраны әр адамның қоғам игілігіне қосқан үлесі маңызды екенін айшықтайды.

Әрбір азамат әлеуметтік желіде мына хэштегтерді белгілеп, игі іске өз үлесін қоса алады:
#МарафонДобрыхДел2026 #ИгіІстерМарафоны2026 #MarathonOfGoodDeeds2026