Елордада жаяу жүргіншілер көпірінде көлігімен ойқастаған жүргізуші қамауға алынды

фото: astana.sud.kz

Астанадағы орталық демалыс саябағында орналасқан «Атырау» жаяу жүргіншілер көпіріне көлігімен шыққан жүргізуші 15 тәулікке қамауға алынды, деп хабарлады Elordainfo.kz.

Айыпталушы досымен бәстескен соң көлігінің мемлекеттік нөмірін шешіп, көпірмен жүргенін айтты.

«Сот отырысында құқық бұзушы кінәсін толық мойындап, жасаған ісіне өкінетінін айтты. Жасалған әрекеттің сипатын, кінәлінің жеке басын, оның құқық бұзушылық жасағанға дейінгі және одан кейінгі мінез-құлқын, істің мән-жайын ескере отырып, соттың қаулысымен Т. ұсақ бұзақылық жасағаны үшін кінәлі деп танылып, 15 тәулікке қамауға алынды», - деді Астана қаласының әкімшілік құқық бұзушылықтар жөніндегі мамандандырылған ауданаралық соты.

Қаулы заңды күшіне енген жоқ.

#жүргізуші