Елордада Талғат Теменовтің шығармашылығына арналған өнер күндері өтеді

28-30 қараша аралығында Қ.Қуанышбаев атындағы Қазақ ұлттық музыкалық  драма театрында Қазақстанның Халық әртісі, көрнекті кино және театр режиссері, драматург, киносценарист, өнертану профессоры Талғат Теменовтің шығармашылығына арналған «Теменовтің суреткерлік әлемі» атты өнер күндері өтеді, деп хабарлады Elordainfo.kz музыкалық жас көрермендер театрының баспасөз қызметіне сілтеме жасап.

Өнер күндері аясында Талғат Теменовтің режиссерлігімен сахналанған қойылымдар көрермен назарына ұсынылып, танымал фильмдерінен үзінділер көрсетіледі.

Талғат Теменов – театр және кино өнерінде танымал тұлғалардың бірі.

«28 қараша күні сағат 17:00-18:30 аралығында «Т.Теменов фильмдерінің эстетикасы» атты шығармашылық кездесу өтеді. Кешкі 19:00-де өнер иесінің шығармашылығына арналған  «Теменовтің суреткерлік әлемі»  атты өнер күндерінің салтанатты ашылуы болады  және 19:15-те У.Шекспирдің «Отелло» трагедиясы  сахналанады», - деп жазылған хабарламада.

29 қараша күні 15:00-де кино және театр режиссерінің «Мыңмен жалғыз алыстым» атты пьесасының ашық оқылымы өтсе, 17:00-де «Т.Теменов фильмдеріндегі көркем бейнелер» атты шығармашылық кездесу болады. Ал сағат 19:00-де B.Ежовтың «Тыраулап ұшқан тырналар» лирикалық драмасы қойылады. 

30 қараша күні 17:00-де  «Т.Теменов фильмдеріндегі рухани құндылықтар» атты шығармашылық кездесу өтеді. Ал сағат 18:00-де Қазақстанның Халық әртісінің шығармашылығына арналған «Теменовтің суреткерлік әлемі» атты өнер күндерінің салтанатты жабылуында  Ш.Айтматовтың «Қызыл орамалды шынарым» лирикалық драмасы көрермен назарына ұсынылады.