Астанада «Әйелге әсемдік жарасады» атты көрме ұйымдастырылды

Елордадағы Ұлттық архивте қазақ халқының зергерлік өнері мен оның мәдени мұрамен байланысына арналған «Әйелге әсемдік жарасады» атты көрме ұйымдастырылды, деп хабарлады Elordainfo.kz Мәдениет және ақпарат министрлігінің баспасөз қызметіне сілтеме жасап.

Көрмеге ұлттық қолданбалы өнер мен сән әлемінің жаңа толқыны үйлесім тапқан құнды жәдігерлер, архивтік құжаттар, ғылыми зерттеулер қойылды.

Көрменің ең құнды жәдігерлерінің бірі – XIX ғасырдың басында жасалған күміс белдік пен Ресей архивінен табылған сол белдікті тағып түскен әйел адамның суреті. Сонымен қатар, қазақ зерттеушілерінің, соның ішінде Ақселеу Сейдімбектің ұлттық киімдер, әшекей бұйымдар мен асыл тастар туралы қолжазба зерттеу еңбектері көрермен назарына ұсынылды.

Іс-шараға тарихшы ғалымдар, этнографтар, филологтар, әдебиеттанушылар, кинематографистер, суретшілер және музей қызметкерлері қатысты.

Дөңгелек үстел қатысушыларына XIX-XX ғасырлардағы қазақ әйелдерінің өмірін бейнелейтін архивтік фото және бейнематериалдар көрмесі ұсынылды. Экспонаттар қатарында Мәскеу, Санкт-Петербург және Гамбург этнографиялық музейінің архивтерінен алынған бірегей құжаттар бар.