Іздеу Қазақстандық туристер 2025 жылы 1,13 трлн теңге қаржы жұмсады
Дәукен Тұрдашев
Қазақстан Республикасында үй шаруашылықтарының сапарларға жұмсаған шығыстары бойынша 11,77 млн адамның 2025 жылы туристік сапарға шыққаны белгілі болды. Оның ішінде республика шегінде 10,26 млн адам (87,2%), ал республикадан тыс жерлерге 1, 5 млн адам (12,8%) сапарлаған, деп хабарлайды Elordainfo.kz Ұлттық статистика бюросына сілтеме жасап.
Статистикалық мәліметке сүйенсек, сапарлардың басым бөлігі, яғни 11,07 млн адамның (94,1%) сапары жеке мақсаттарға тиесілі. Іскерлік және кәсіби мақсаттағы сапарлар саны 695 200 адамды (5,9%) құрап отыр.
Ең көп сұранысқа ие өңірлер қатарында Астана қаласы (10,1%), Түркістан облысы (10%), сондай-ақ Алматы қаласы (9,9%), Алматы (7,9%) және Қарағанды (7,4%) облыстары бар.
Ел ішінде саяхаттағандардың көпшілігі туыстары мен таныстарына баруды жөн көрген – 60,8%. Қонақ үйлерде тоқтағандар үлесі – 14,2 %, жалдамалы тұрғын үйлерде тұрғандар – 11,5%, ал санаторийлерде аялдағандар – 3,6%.
Көлік түрлері бойынша ел ішінде сапарлағандар көбіне жеке автокөлікті (36,1%) және теміржол көлігін (26,4%) таңдаған. Ал шетелге шыққандардың басым бөлігі әуе көлігін (55,7%) пайдаланған.
2025 жылы туристік сапарларға жұмсалған жалпы шығын көлемі 1,13 триллион теңгені құрады. Оның ішінде ел ішіндегі сапарларға жұмсалған қаражат – 659,2 млрд теңге немесе 58,1%.
Қазақстан ішінде сапарлаған туристердің негізгі шығындары тауар сатып алуға (25,7%), көлік қызметтеріне (25,5%), тамақтануға (20,8%) және орналастыру орындарында тұруға (12,2%) бағытталған.
Бұдан бұрын шетелдік баспасөздердің Астана туризмі туралы не жазып жатқанына шолу жасаған едік.
