Мәжіліс депутаты: Тарихына сүйенген, егемендігін қорғай білетін ел ғана болашағын нық құра алады

Тарих – ұлттың ең сенімді тірегі. Қазақстанның жаңа Конституция жобасында тарихи сабақтастық ұстанымы алдыңғы қатарда қарастырылған. Бұл туралы Мәжілістің жалпы отырысында AMANAT партиясы фракциясының мүшесі Еркін Әбіл айтты, деп хабарлады Elordainfo.kz.

«Бұл – мемлекеттің мыңжылдық даму тарихын, ұлттық мәдени кодын және басқару тәжірибесін құқықтық негізде айқындайтын нақты норма. Осы тұрғыдан «Ұлы дала» ұғымының Конституцияда көрініс табуы – тарихи сабақтастықты құқықтық деңгейде бекітудің нақты дәлелі. «Ұлы дала» ұғымы – эмоциялық немесе поэтикалық тіркес емес. Бұл – Қазақстан мемлекеттілігінің тарихи кеңістігі, мәдени коды және жауапкершілік философиясын бейнелейтін нақты ұғым. Тарихи сабақтастық елдің өткенін, бүгінін және болашағын жалғайтын құқықтық көпірге айналады. Ол өзімізге де, басқа елдерге де мемлекеттің терең тамырын, ұлттық дәстүрін және өркениеттік сабақтастығын көрсетеді», - деді Мәжіліс депутаты.

Еркін Әбілдің айтуынша, бұл ұстаным халықаралық тәжірибеге де сай келеді. Қытай, Мажарстан, Польша, Литва секілді мемлекеттер өз конституциясында тарихи сабақтастықты ұлттық егемендіктің негізі ретінде нақтылаған.

«Бұл елдер оны қандай да бір қауіп төндіреді деп қабылдады деймісіздер? Жоқ.  Ол ешқандай артықшылық та, бөлінушілік те тудырмайды. Керісінше, мемлекеттің тұтастығы мен тұрақтылығын нығайта түседі. Қазақстан үшін де бұл – қисынды әрі әділетті қадам. Маңыздысы – бұл норма ешкімді бөліп-жармайды, керісінше, ортақ тарих пен құндылықтар төңірегінде қоғамды біріктіреді. Әбіш Кекілбаевтың сөзімен айтсақ, «Елдікті, бірлікті сақтайтын – адамдардың ортақ ойы мен ортақ мүддесі». Осы қағида жас ұрпақ үшін де маңызды, себебі елдің бірлігі мен тұрақтылығы – ұлттық сананың беріктігіне тікелей байланысты», - деді халық қалаулысы.

Оның пайымынша, мемлекеттің унитарлы сипаты – тұрақтылық пен біртұтастық кепілі.

«Егемендік пен Тәуелсіздік жаңа Конституцияның басты қағидаттары. Мемлекет басшысы атап өткендей «Тәуелсіздік бәрінен қымбат». Қолданыстағы Конституцияда: «Қазақстан Республикасы – президенттік басқару нысанындағы біртұтас мемлекет» деп жазылған. Жаңа Конституцияда бұл тұжырым нақтыланып, былайша айқындалды, «Қазақстан Республикасы – унитарлы мемлекет. Басқару үлгісі – президенттік республика». Осы жерде бір нәрсені түсінуіміз керек. Бұл – мемлекеттің аумақтық тұтастығын, құқықтық кеңістіктің біртұтастығын және басқару жүйесінің айқындығын қамтамасыз ететін норма. Сонымен бірге, 3-баптағы норма да нақтыланды: «Мемлекеттік биліктің бірден-бір бастауы және егемендік иесі – Қазақстан халқы». Бұл – халықтың биліктің нақты субъект ретінде танылуы. Қарсы уәждер болуы мүмкін, кейбіреулер бұл норманы билік бөлінісін әлсіретеді деп ойлауы мүмкін. Алайда тәжірибе көрсеткендей, егемендіктің нақты субъектісін көрсету биліктің заңдылығын күшейтіп, мемлекеттің тұтастығын қамтамасыз етеді», - деді Е.Әбіл.

Депутаттың сөзінше, жаңа Конституция – жаңа дәуірдің құқықтық қаңқасы.

«Тарихи сабақтастық, «Ұлы дала» ұғымы, унитарлы мемлекет сипаты және халықтың егемендік иесі ретіндегі мәртебесі – жаңа Конституцияның өзара байланысты негізгі тіректерін құрайды. Барлығы бірге мемлекеттің құқықтық, тарихи және мәдени негізін бекітіп, тұрақтылық пен бірліктің кепілі болады. Бұл құжат –  тек құқықтық негіз ғана емес, қоғамдағы келісім мен сенімнің берік тірегі. Жаңа Конституция – жаңа дәуірдің құқықтық қаңқасы. Ал «Ұлы дала» және тарихи сабақтастық – осы қаңқаны мазмұнмен, рухани мәнмен толықтыратын өзек. Тарихына сүйенген, егемендігін қорғай білетін, біртұтас мемлекеттілікті бекіткен ел ғана болашағын нық құра алады», - деп сөзін түйіндеді Мәжіліс депутаты.

Еске салсақ, жақында Қазақстан Республикасының жаңа Конституциясының жобасы жарияланған болатын.