Атырауда құны 700 млн теңгеден асатын мүлік мемлекетке қайтарылды

Фото: Оңалхан Өнерхан

Атырау қаласының прокуратурасы мемлекетке құны 700 млн теңгеден асатын мүлікті қайтарды, деп хабарлайды Elordainfo.kz Бас прокуратураға сілтеме жасап.

Жер қатынастары және мемлекеттік мүлікті басқару саласындағы заңдылықты талдау барысында прокурорлар сенімгерлік басқарудың тиімсіздігі фактілерін анықтады.

«Жергілікті атқарушы орган жеке кәсіпкерге құны 93,7 млн теңге болатын жертөле үй-жайын берген. Кәсіпкердің шарт талаптарын орындамағанына қарамастан, жергілікті атқарушы орган ұзақ уақыт бойы нысанды уақтылы алып қою бойынша шаралар қабылдамаған. Осыған байланысты прокуратура заңдылықтың бұзылуын жою туралы, соның ішінде басқа да осыған ұқсас жағдайлар бойынша ұсыну енгізді, делінеді хабарламада.

Қарау нәтижелері бойынша мемлекет балансына жалпы құны 400 млн теңгеден асатын жылжымайтын мүлік нысандары қайтарылды. Сонымен қатар, жер пайдалану саласында тәртіп орнату бойынша шаралар қабылданды. Атап айтқанда, прокурорлық қадағалау актісі бойынша мемлекет табысына ұзақ уақыт бойы мақсаты бойынша игерілмей келген, жалпы құны 300 млн теңге болатын 28 жер учаскесі қайтарылды.

Прокуратура жер қатынастары саласындағы заңдылықты қамтамасыз ету және мемлекеттік мүлікті қорғау тұрақты бақылауда екенін хабарлады.

Еске салсақ, Түркістанда өз балаларын асыраудан жалтарғандар жауапқа тартылды.