Астанада аялдаманы қиратып, қоғамдық тәртіпті бұзғандар анықталды, деп хабарлады Elordainfo.kz Polisia.kz-ке сілтеме жасап.

Елордада полицейлер түнгі уақытта автобус аялдамасында өзін орынсыз ұстаған үш жас жігітті ұстады. Олар қатты дауыстап, қоғамдық тәртіпті бұзған сәтте бірі екіншісін итеріп жібереді, нәтижесінде жігіт павильонның әйнек есігіне соғылады. Нәтижесінде әйнекті сындырады.

Хабарлама түскеннен кейін оқиға орнына полиция жасағы жетті. Бұзақылар жақын маңдағы аулада анықталып, полиция бөліміне жеткізілді. Бөтеннің мүлкін бүлдіргені үшін екі азамат әкімшілік жауапкершілікке тартылып, сот шешімімен әрқайсысы 10 тәулікке қамауға алынды. Үшінші қатысушы да түнгі уақытта тыныштықты бұзғаны үшін жауапкершілікке тартылды.

Полиция жылы аялдама павильондары елорда тұрғындарының қолайлығы үшін орнатылатынын еске салады. Олар азаматтардың қоғамдық көлікті ыңғайлы жағдайда күтуіне және қыс кезінде тоңбауына мүмкіндік береді. Қалалық мүлікке ұқыпты қарау қажет, оны бүлдіру – барлық тұрғындарға және қаланың келбетіне зиян келтіреді.