Асламбек Мерғалиев: Конституциялық реформа қоғамның заманауи сұраныстарына жауап береді

Фото: Жоғарғы сот

ҚР Жоғарғы сотының төрағасы Асламбек Мерғалиев сот алқаларының төрағаларымен және Сот әкімшілігінің басшылығымен өткізген кеңесте осылай мәлімдеді. Жиында жаңа Конституция жобасы талқыланды, деп хабарлайды Elordainfo.kz Жоғарғы соттың баспасөз қызметіне сілтеме жасап.

Кездесу барысында А. Мерғалиев жаңа Негізгі заң жобасының жариялануы және оның кең көлемде қоғамдық талқылауға ұсынылуы мемлекеттік биліктің ашықтығын және азаматтық қоғамның пікірін ескере отырып, маңызды саяси шешімдер қабылдауға дайын екенін көрсететінін атап өтті.

Жоғарғы сот төрағасының айтуынша, ұсынылып отырған өзгерістер ауқымды әрі жүйелі сипатқа ие болып, Конституцияның іс жүзінде барлық бөлімін қамтиды.

Конституциялық түзетулер жобасын талқылай отырып, кеңеске қатысушылар азаматтардың негізгі құқықтары мен бостандықтарын қорғау кепілдіктерін күшейтудің маңыздылығын, соның ішінде сот жүйесінің тәуелсіздігін нығайтудың қажеттігін атап өтті.

Әкімшілік соттардың құқықтық мәртебесін арттыруға ерекше назар аударылды, бұл, атап өтілгендей, жария-құқықтық дауларда азаматтардың құқықтарын қорғау кепілдіктерін қамтамасыз етуге оң әсерін тигізеді.

Кездесуге қатысушылар атап өткендей, жүзеге асырылып жатқан конституциялық реформа қоғамның заманауи сұраныстарына жауап береді және мемлекеттің ең жоғары құндылық ретінде адамды, оның өмірін, құқықтары мен бостандықтарын тану қағидатына адалдығын растайды.

Еске салсақ, таяуда Қазақстан Республикасының жаңа Конституциясының жобасы жарияланды