Абай облысының кәмелетке толмағандар істері жөніндегі мамандандырылған ауданаралық сотының 5 қарашадағы үкімімен Семей қаласының кәмелетке толмаған тұрғыны, колледждің үшінші курс студенті психотроптық заттарды өткізуге қатысқаны үшін сотталды, деп хабарлады Elordainfo.kz облыстық прокуратураға сілтеме жасап.
Кәмелетке толмаған жасөспірім «жасырын белгілеушілер» рөлінде бір айдан сәл астам уақыт жұмыс істеген.
Жасын және істің мән-жайын ескере отырып, сот оған кәмелетке толмағандарды ұстауға арналған орташа қауіпсіздік деңгейіндегі қылмыстық-атқару жүйесі мекемесінде өтеуге тиіс 5 жыл мерзімге бас бостандығынан айыру жазасын тағайындады.
Абай облысының прокуратурасы азаматтарды, әсіресе жасөспірімдер мен олардың ата-аналарын мессенджерлер мен әлеуметтік желілер арқылы құқыққа қайшы схемаларға тартудың ерекше қауіптілігін ескертеді, себебі «жылдам табыс» туралы кез келген ұсыныстар — жасырын салым, курьерлік тапсырмалар не белгісіз заттарды сақтау — ауыр қылмыстық жауапкершілікке алып келеді.
Бұған дейін Қостанайда жасырын есірткі желісін ұйымдастырған топ қатаң жазаға тартылғанын жаздық.
