Қазақстанда отандық тауар өндірушілердің бірыңғай тізілімі құрылады. Бұл туралы Үкімет отырысында өнеркәсіп және құрылыс министрі Ерсайын Нағаспаев мәлімдеді, деп хабарлады Elordainfo.kz.

«Биылғы заңнамалық жаңалықтардың бірі – қазақстандық тауар өндірушілердің бірыңғай реестрі. Бұл – өндірушілер мен олардың өнімдері туралы мәліметтерді қамтитын мемлекеттік цифрлық жүйе. Реестрге енгізу жинақталған мәліметтер негізінде «жалған өндірушілерді» анықтауға, ашықтықты арттыруға, жемқорлықты азайтуға мүмкіндік береді», – дейді Ерсайын Нағаспаев.

Реестрге енгізу механизмі төрт кезеңнен тұрады:

-ақпараттық жүйе арқылы өтінім беріп, электрондық цифрлық қолтаңба арқылы деректерді өңдеуге рұқсат беретінін растайды;

-мемлекеттік деректер базасымен цифрлық тексеріс арқылы ұсынылған мәліметтердің дұрыстығы тексеріледі;

-технологиялық операциялардың орындалуы бағаланады, қажет болған жағдайда өндірістік алаңға барып бағалау жүргізіледі;

-реестрдегі отандық тауар өндірушілерге тоқсан сайын мониторинг жасалады.

Мемлекет басшысы тізілімнің жұмыс істеу тәртібін реттейтін заңға биыл 19 мамырда қол қойған.