Іздеу Астанада көппәтерлі тұрғын үй кешендерінің заңсыз құрылысы анықталды
Жібек Наурыз
«Нұра» ауданының прокуратурасы заңсыз құрылыс нысандарын анықтау және жолын кесу бойынша белсенді жұмыстарды жалғастырып жатыр. Нәтижесінде Сәулет басқармасымен, «Астана Генплан» ЖШС-мен және Мемлекеттік сәулет-құрылыс бақылауы басқармасымен (МСҚБ) бірлескен қадағалау іс-шаралары барысында елордадағы құрылыс алаңдарында елеулі заң бұзушылықтар анықталды, деп хабарлайды Elordainfo.kz Астана қаласы прокуратурасына сілтеме жасап.
Атап айтқанда, Ш. Айтматов көшесі, 24/8 учаскесінің маңында жапсарлас үй-жайлары мен паркингі бар көппәтерлі тұрғын үй кешенінің құрылысы анықталды. Тексеру барысында құрылыс-монтаж жұмыстары сараптаманың оң қорытындысынсыз және құрылыс-монтаж жұмыстарының басталғаны туралы хабарламасыз жүргізіліп жатқаны белгілі болды.
Сонымен қатар, Ш. Айтматов көшесі мен Е164 көшесінің қиылысында жапсарлас үй-жайлары, медициналық орталығы және паркингі бар көппәтерлі тұрғын үй кешенінің құрылысы анықталды. Құрылыс жер учаскесіне тиісті құқықсыз, жобалық-сметалық құжаттамасыз, құрылыс-монтаж жұмыстарының басталғаны туралы хабарламасыз, сондай-ақ сараптама қорытындысыз жүргізілген.
Прокуратура жұмыстарды тоқтату туралы хабарламалар алғанына қарамастан, заң талаптарын елемеген құрылыс салушыларға ерекше назар аударады. Қала құрылысы саласындағы заңдылықты қамтамасыз ету жұмыстары тұрақты бақылауда.
Елорда прокуратурасы сәулет және қала құрылысы саласындағы заңнаманы бұзғаны үшін жауапкершілік қарастырылғанын еске салады және құрылыс салушыларды белгіленген нормалар мен талаптарды қатаң сақтауға шақырады.
Еске салайық, бұдан бұрын да Астанада заңсыз салынып жатқан құрылыс нысандары анықталғаны туралы жаздық.
