Іздеу 
Жалған ақпаратқа қарсы орталық: Сайлау қарсаңында дипфейктер қайта тарала бастады
Думан Аманжол
Президент жанындағы Орталық коммуникациялар қызметінің Жалған ақпаратқа қарсы іс-қимыл орталығы елдегі саяси үдерістерге қатысты дипфейктердің қайта тарай бастағанын ескертті, деп хабарлайды Elordainfo.kz.
Орталықтың мәліметінше, сайлау науқаны кезеңінде әлеуметтік желілерде жасанды интеллектінің көмегімен жасалған жалған бейнероликтер жиі таралуда. Мұндай материалдарда жекелеген мемлекеттік лауазымды тұлғалар мен саяси қайраткерлерге, оның ішінде өкілеттігін тоқтатқан бұрынғы депутаттарға қатысты жалған мәлімдемелер таңылуда.
Мұндай материалдар тек технологиялық жаңалық емес, ақпараттық ықпал етудің бұрыннан белгілі тәсілдерінің жалғасы. Бұған дейін сайлау үдерісіне нұқсан келтіру мақсатында қолдан жасалған құжаттар, жалған дәйексөздер, фейк аудиожазбалар мен кандидаттар атынан дайындалған материалдар пайдаланылып келді. Бүгінде бұл әдістер адамның бет-бейнесін, дауысы мен сөйлеу мәнерін дәл айнытпай қайталайтын дипфейк технологияларымен толықтырылуда.
«Мұндай материалдардың басты мақсаты – сайлау процесіне қатысушыларға деген сенімсіздікті қалыптастыру және саяси рәсімдердің заңдылығына күмән келтіру. Осы тектес өнімдердің авторлары ақпараттық кеңістікте бейнероликтерді неғұрлым көп таратқан сайын, азаматтардың шынайы ақпарат пен жасанды контентті ажыратуын соғұрлым қиындатуды көздейді», - делінген хабарламада.
Әдетте мұндай бейнематериалдар анонимді аккаунттар арқылы таратылады және оларды шұғыл бөлісуге шақыратын эмоциялық сипаттағы жазбалармен қатар жүреді. Сонымен қатар белгілі бір жағдайдың түпнұсқа бейнежазбасы ұсынылмайды, ал материалдың өзі саяси партиялардың, кандидаттардың ресми ресурстарында немесе тіркелген бұқаралық ақпарат құралдарында жарияланбайды.
«Жасанды интеллект технологиялары қарқынды дамып жатқан кезеңде бейненің шынайылығына емес, ресми дереккөзге сенім артқан жөн. Ақпараттық манипуляция технологиясының бір бөлігіне айналмаңыз. Кез келген ақпаратты таратпас бұрын міндетті түрде тексергеніңіз дұрыс», - деп ескертті Жалған ақпаратқа қарсы іс-қимыл орталығы.
Еске салсақ, Астанада алаяқтардың қоңырауларын бұғаттайтын Anti Call-орталығы іске қосылды.
