Елімізде алюминийді ішкі өңдеу көлемі екі есеге артты

Бұл туралы Орталық коммуникациялар қызметінде ҚР Өнеркәсіп және құрылыс министрлігінің Өнеркәсіп комитеті төрағасының орынбасары Ғалымжан Төребек мәлімдеді, деп хабарлады Elordainfo.kz.

2024 жылы бастапқы алюминийді қайта өңдеу 2021 жылмен салыстырғанда 2 есеге артып, 54 мың тоннаны құрады. Биыл бұл көрсеткішті 93 мың тоннаға жеткізу жоспарланып жатыр. Ғалымжан Төребектің айтуынша, қазіргі уақытта өңделген алюминийден жасалатын өнім көлемі ұлғайды. 

«Биыл бастапқы алюминийді өңдеу нәтижесінде алюминді профильдарды шығару көлемін өткен жылмен салыстырғанда 16 мың тоннадан 25 мың тоннаға, немесе 36%-ға арттыру көзделген. Сонымен қатар, профильді өндіруге арналған цилиндрлік құймаларды шығару көлемі 16,4%-ға ұлғайтылмақ», - деді спикер ОКҚ алаңында өткен баспасөз конференциясында. 

Сонымен қатар, 2029 жылға қарай алюминийді қайта өңдеу 163 мың тоннаға дейін жеткізілмек.