Іздеу 
«Таза Қазақстан»: Республикалық автожолдар бойына 3 мыңға жуық ағаш көшеті егілді
Думан Аманжол
«Таза Қазақстан» акциясы аясында республикалық маңызы бар автокөлік жолдарын көгалдандыру мен абаттандыру жұмыстары жалғасуда, деп хабарлайды Elordainfo.kz Көлік министрлігіне сілтеме жасап.
Елімізде республикалық «Таза Қазақстан» экологиялық акциясы аясында республикалық маңызы бар автокөлік жолдарын көгалдандыру, абаттандыру және олардың тазалығын қамтамасыз ету бойынша кешенді жұмыстар жүргізілуде.
«Бүгінде республикалық маңызы бар автомобиль жолдарының жалпы ұзындығы 25 мың шақырымды құрайды. Оның шамамен 6,3 мың шақырымы немесе 17 мың гектардан астам аумағы жасыл желекпен көмкерілген. Жыл сайын бұл аумақтарда ағаштарды суару, қураған ағаштарды санитарлық кесу, гүлзарларды күтіп-баптау, артық өскіндерді тазарту, өрттің алдын алу мақсатындағы минералдандырылған жолақтар жасау және жасыл желектерді қорғау шаралары тұрақты түрде атқарылады», делінген хабарламада.
Ведомство мәліметінше, биыл «Таза Қазақстан» акциясы аясында республикалық маңызы бар автожолдардың бойына, демалыс алаңдары мен жол пайдалану бөлімшелерінің аумақтарына өңірлердің табиғи-климаттық жағдайына бейімделген түрлі ағаш көшеттері отырғызылды. Жалпы саны 3 мыңға жуық көшет егілді. Олардың қатарында қарағаш, қарағай, қайың, үйеңкі, шаған, мойыл және мамығы жоқ терек бар.
Автокөлік жолдарының санитарлық тазалығын сақтау да тұрақты назарда. Жол жиектері, еңістер, жол жолағы, демалыс алаңдары мен автобус аялдамалары тұрмыстық қалдықтардан, ескі автокөлік шиналарынан және басқа да қоқыстардан жүйелі түрде тазартылып келеді.
«2026 жылдың алғашқы жартыжылдығында жол бойындағы жалпы аумағы шамамен 312 миллион шаршы метр жер тазартылды. Бұл жұмыстар күн сайын жүргізіліп, автомобиль жолдарын күтіп-ұстаудың маңызды бөлігі ретінде жол қозғалысының қауіпсіздігін қамтамасыз етуге, жол пайдаланушылары үшін қолайлы жағдай жасауға және жол бойындағы аумақтың экологиялық ахуалын сақтауға бағытталған», деп хабарлады ведомствоның баспасөз қызметі.
Айта кетейік, автокөлік жолдарының тазалығы тек жол қызметтеріне ғана емес, әрбір жүргізушінің жауапкершілігіне де байланысты. Осыған орай ведомство өкілдері барлық жүргізушілер мен жолаушыларды табиғатқа жанашырлықпен қарап, жол бойына қоқыс тастамауға, Қазақстанның табиғатын бірге қорғауға шақырды.
Еске салсақ, бүгіннен бастап Қарағанды – Балқаш – Бурылбайтал және Бурылбайтал – Күрті учаскелерінде ақылы режим қолданыла бастайды. Ал 11 шілдеден бастап Талдықорған – Өскемен учаскесінде ақылы режим енгізіледі.
