Іздеу Қазақстанда астананы кешенді дамыту тетіктері заңнамалық тұрғыдан бекітілді
Ернұр Қайнар
Парламент астана мәртебесін айқындауға, мемлекеттік басқарудың тиімділігін арттыруға және азаматтар үшін жайлы әрі қауіпсіз қалалық орта қалыптастыруға бағытталған «Қазақстан Республикасы астанасының мәртебесі туралы» Конституциялық заңды екінші оқылымда қабылдады, деп хабарлайды Elordainfo.kz Мәжілістің баспасөз қызметіне сілтеме жасап.
Заңда жергілікті мемлекеттік басқарудың ерекшеліктері қарастырылған. Олардың қатарында астананың республиканың саяси, әкімшілік, мәдени және экономикалық орталығы ретіндегі рөлін атқаруы үшін жағдай жасау, орнықты әлеуметтік-экономикалық және инфрақұрылымдық дамуы арқылы оның бәсекелестік мүмкіндіктерін арттыру, сондай-ақ халықаралық қатынастар орталығы ретіндегі рөлін күшейту бар.
Бұдан бөлек, астана мәслихаты мен әкімдігінің өкілеттіктері бекітіледі. Мәслихат басқа мемлекеттердің жергілікті өкілді органдарымен халықаралық байланыстар орнатады, мемлекет қажеттілігі үшін жер телімін немесе өзге де жылжымайтын мүлікті иеліктен шығару туралы шарттардың жобаларын келіседі, қала құрылысы регламентін және астана аумағын құрылыстық игеру схемаларын бекітеді.
Өз кезегінде әкімдікке реконструкциялау объектілерін жобалау, салу және пайдалануға беру мерзімдеріне бақылау жасауды жүзеге асыру, апаттық жағдайдағы көппәтерлі тұрғын үйлерді бұзуды ұйымдастыру, қаланың біртұтас архитектуралық келбетін қалыптастыру және астананың дизайн-кодын сақтау үшін жөндеуге жататын көп пәтерлі тұрғын үйлердің тізбесін айқындау, сондай-ақ жол қозғалысын ұйымдастырудың кешенді схемасын әзірлеу құзыреттері беріледі.
Сондай-ақ заң аясында қала аумағы мен қала маңы аймағына, астананың инфрақұрылымына қатысты мәселелер және басқа да бағыттар реттеледі. Бұл ретте орманды саябақ аймағы қорғаныстық, экологиялық және рекреациялық функцияларды атқаратын аумақ ретінде айқындалады. Оның шекараларын белгілеу мен өзгертуді астана әкімдігінің ұсынуы бойынша Үкімет жүзеге асыратын болады.
Еске сала кетейік, Парламент екінші оқылымда «Қазақстан Халық Кеңесі туралы» Конституциялық заңды қабылдады.
