Елімізде кейбір ХҚКО-лар алдын ала жазылу форматына көшті

Фото: Цифрлық даму, инновациялар және аэроғарыш өнеркәсібі министрлігі

Еліміз бойынша 32 аудандық және қалалық ХҚКО бөлімінде қызмет көрсету алдын ала жазылу форматына көшірілді, деп хабарлайды Elordainfo.kz Азаматтарға арналған үкімет мемлекеттік корпорациясының баспасөз қызметіне сілтеме жасап.

Енді тұрғындар өзіне ыңғайлы күн мен уақытты алдын ала таңдап, белгіленген уақытта келе алады, қабылдау тек алдын ала броньдалған талондар бойынша жүзеге асырылады.

20 ақпаннан бастап пилоттық жобаға қосымша тағы 22 бөлім қосылды. Бұл, әсіресе шалғай өңір тұрғындарына кезек күтпей, сапарын алдын ала жоспарлауға мүмкіндік береді, - делінген .

Алдын ала жазылу «ЦОН» және «Egov mobile» мобильді қосымшалары электрондық үкімет порталы талон беру киоскілері арқылы қолжетімді.

Бұл ретте дайын құжаттарды беру, өзіне-өзі қызмет көрсету аймағы және құжаттандыру қызметтері бұрынғы режимде, яғни алдын ала жазылусыз көрсетіледі.

Сонымен қатар келушілердің жекелеген санаттары үшін арнайы жұмыс орны қарастырылған. Ол Екінші дүниежүзілік соғыс ардагерлеріне, мүмкіндігі шектеулі азаматтарға және шетелдік азаматтарға арналған.

Атап өтсек, жоба пилоттық режимде жүзеге асырылып отыр. Талдау қорытындысы бойынша қызметті одан әрі кеңейту және ауқымын ұлғайту туралы шешім қабылданады.

Еске салайық, бұдан бұрын астаналық ХҚКО бөлімшесінде цифрлық сауаттылықты тегін үйренуге болатынын жаздық.