Жас журналистер арасында халықаралық байқау жарияланды

АҚШ-та тіркелген KazUnite медиа компаниясы Қазақстанның Тәуелсіздігі күніне орай студенттер арасында «Тәуелсіздік – тұғырым!» атты мақала жазудан халықаралық байқау жариялады, деп хабарлады Elordainfo.kz.

Байқаудың мақсаты – Қазақстанның көрші және бауырлас, сонымен қатар достық ниеттегі елдермен, соның ішінде АҚШ-пен қарым-қатынасын, дипломатиялық байланысын дәріптеу.

Айта кетсек, АҚШ – Қазақстанның Тәуелсіздігін алғашқы болып мойындаған елдердің бірі. Егемендік алғаннан кейін ғана еліміз Америка Құрама Штаттарымен тығыз байланыс орнатқан болатын.

Байқауға әлемнің кез келген жерінен жазуға бейімі бар (қазақ тілінде жазатын) университеттер мен колледж студенттері қатыса алады.

Мақалада авторлар Қазақстанның Тәуелсіздігін ең алғашқы болып мойындаған елдермен, соның ішінде АҚШ-пен қарым-қатынасы, достығы, саяси-экономикалық, мәдени-гуманитарлық байланысы туралы барынша жан-жақты талдап жазуы керек. Сарапшылардың пікірі де ескерілуі тиіс.

Мақала көлемі 14 шрифтпен, А4 парағымен есептегенде 1,5-2 беттен аспауы қажет.

Байқауға белгілі тележүргізуші, Qazaqstan ұлттық арнасының қызметкері, Нью-Йорк фильм академиясының түлегі Арай Канапьяева (АҚШ), Turkistan телеарнасының атқарушы директоры Жанна Жайлаубайқызы (Қазақстан), Kaznews.mn ақпарат агенттігінің басшысы Өмірбек Қабай (Моңғолия), белгілі диктор, «Ақпарат саласының үздігі» Қуат Ахметжанов (Қазақстан) және Elorda Aqparat медиа холдингінің журналисі Гүлмира Аймағанбет сынды сала мамандары қазылық етеді.

Жеңімпаздар мен жүлдегерлер мақтау қағаздарымен және қаржылай сыйлықпен (1-орын – 100 000 теңге; 2-орын – 50 000 теңге; 3-орын – 25 000 теңге) марапатталады.

Материалдар 15 желтоқсан Астана уақытымен сағат түнгі 23.00-ге дейін қабылданады.

Конкурсқа қатысу үшін материалдарды төмендегі электрондық поштаға жолдау керек: nurekekakish@gmail.com.

Байланыс (WhatsApp) нөмірі: +7 775 501 33 38 Нұрдәулет (қосымша сұрақтар болса, тек уатсаптан жазамыз).

Материалмен қоса байқауға қатысушы жеке куәлігінің көшірмесін немесе электронды нұсқасын және студенттік билет суретін яки оқу орнынан анықтама жолдауы тиіс.

Конкурс қорытындысы 16-20 желтоқсан аралығында kazunite.com халықаралық онлайн газетінде және басылымның әлеуметтік желілерінде жарияланады.

Айта кетейік, KazUnite – АҚШ-тағы қазақ тілінде ақпарат тарататын тұңғыш басылым.