«Әділет» партиясы AMANAT партиясының басшылығы мен мүшелеріне алғыс айтты

Фото: «Әділет» партиясы

«Әділет» партиясы AMANAT партиясының басшылығы мен мүшелеріне партия құрамына қосылу туралы қабылдаған шешімі үшін алғыс айтты, деп хабарлайды Elordainfo.kz «Әділет» партиясына сілтеме жасап.

«Біз бұл шешімді маңызды әрі жауапты қадам деп санаймыз. Әрі оны Мемлекет басшысы Қасым-Жомарт Тоқаевтың Әділетті Қазақстанды құруға және азаматтардың мүддесіне сай жүйелі реформаларды жүзеге асыруға бағытталған саясатын қолдау деп қабылдаймыз.

Бүгінде алдымызда халықтың игілігі үшін еңбек ету, азаматтардың өмір сапасын арттыруға ықпал ету, заң үстемдігі мен әділеттілікті нығайту, елдегі оң өзгерістерді қолдау сынды ортақ мақсат тұр.

«Әділет» партиясы жауапкершілік, адал еңбек және Қазақстанның даму жолындағы құндылықтарын қолдайтын барша азаматқа ашық. Біз бірге халықтың әл-ауқатын арттыруға және мемлекеттің тұрақты дамуына бағытталған бастамаларды ілгерілету жұмысын жалғастырамыз», – делінген «Әділет» партиясының ресми хабарламасында.

Айта кетейік, осыған дейін «Әділет» партиясы AMANAT партиясының қосылуын қолдағанын жазған едік.